जांभूळ - मोहफुलावर प्रक्रिया उद्योगही हवा
लोकमत न्यूज नेटवर्क
गडचिरोली : जिल्ह्यात स्ट्रॉबेरी लागवडीचा प्रयोग यशस्वी झाला आहे. आपण स्वत: सहा शेतकऱ्यांना महाबळेश्वर येथून स्ट्रॉबेरीची रोपे उपलब्ध करून दिली होती. त्याची लागवड यशस्वी होऊन शेतकऱ्यांना लाभ झाला आहे. त्यामुळे गडचिरोली जिल्ह्यात स्ट्रॉबेरी शेतीला चालना मिळावी, अशी सूचना नगर विकासमंत्री तथा गडचिरोलीचे पालकमंत्री एकनाथ शिंदे यांनी केली. खरीप हंगामाच्या पूर्वतयारीचा आढावा घेण्यासाठी सोमवारी कृषिमंत्री दादाजी भुसे यांच्या अध्यक्षतेखाली नागपूर विभागीय बैठक झाली. त्यात ना. शिंदे यांनी व्हिडिओ कॉन्फरन्सिंगने सहभागी होऊन गडचिरोली जिल्ह्याच्या कृषी विकासासाठी विविध मुद्दे मांडले.
गडचिरोलीला सेंद्रीय शेतीचा जिल्हा म्हणून ओळख मिळावी, यासाठी कृषी विभागाने विशेष नियोजन करावे. पारंपरिक शेतीला आधुनिकतेचे बळ देतानाच ती कमी खर्चाची आणि उत्पादन वाढविणारी असावी, यासाठी कृषी विद्यापीठांनी वाण आणि अवजार संशोधन करावे, असे आवाहन यावेळी पालकमंत्र्यांनी केले.
कोरची तालुक्यात जांभळाचे वन आहे. येथील जांभळांना संपूर्ण राज्यभर बाजारपेठ उपलब्ध करून देणे आवश्यक असून, संपूर्ण गडचिरोली जिल्ह्यात जांभळाची शेती करण्यासाठी प्रोत्साहन आणि प्रक्रिया उद्योगदेखील सुरू करावा, अशी अपेक्षा ना. शिंदे यांनी व्यक्त केली.
दक्षिणेकडील तालुक्यांना तेलंगणातून खत पुरवठा व्हावा
गडचिरोली जिल्ह्याला खतांचे वितरण चंद्रपूर येथून केले जाते. सिरोंचा तालुका हा सुमारे ३५० किमी अंतरावर आहे. अशावेळी या तालुक्याला खतांचा पुरवठा लगतच्या तेलंगणा येथून करण्याची परवानगी देण्यात यावी, जेणेकरून वेळेची बचत होतानाच वाहतूक खर्चही कमी होईल, असे पालकमंत्र्यांनी सूचविले.
मोहफुलांचा वापर पोषक आहारासाठी करावा
गडचिरोली जिल्ह्यात मोहफुलांची मोठी आर्थिक उलाढाल होते. सुमारे ३ लाख मजूर मोहफूल गोळा करण्याचे काम करतात. त्याद्वारे १४०० कोटी रुपयांची उलाढाल होते. अशा या मोहफुलांचा वापर केवळ मद्यनिर्मितीसाठी न करताना त्यातील औषधी आणि पोषण मूल्ये यासंदर्भात झालेले संशोधन लक्षात घेऊन या फुलांचा वापर पोषक आहारासाठी करण्यासाठी प्रयत्न करावेत. याठिकाणी प्रक्रिया केंद्र सुरू करण्यात यावे, अशी मागणी पालकमंत्र्यांनी केली.
धान साठवणुकीसाठी गोदामांची संख्या वाढवावी
जिल्ह्यात धान साठविण्यासाठी गोदामांची संख्या वाढविणे आवश्यक आहे. हा विषय कृषी संलग्न असल्याने गडचिरोली जिल्ह्यात गोदामांची संख्या वाढविण्यात यावी, जेणेकरून धानाची साठवण क्षमतादेखील वाढविता येणे शक्य होईल. गडचिरोली जिल्ह्यात कृषी विभागाची २७९ पदे रिक्त असून, ती तातडीने भरण्याची मागणीही पालकमंत्री शिंदे यांनी कृषिमंत्री भुसे यांच्याकडे केली.