गडचिरोली : एकात्मिक आदिवासी विकास प्रकल्प गडचिरोली अंतर्गत आरमोरी येथे आदिवासी मुलांचे शासकीय वसतिगृह चालविल्या जात आहे. या वसतिगृहाला प्रकल्प अधिकारी पी. शिवशंकर व वित्त व नियोजन अधिकारी डी. बी. खडतकर यांनी ३ जानेवारी रोजी भेट दिली असता, यात वसतिगृहाचे अधीक्षक मैंद यांनी तब्बल ७९ विद्यार्थी गैरहजर असताना त्यांना पटावर उपस्थित दाखविले. याप्रकरणी प्रकल्प अधिकारी पी. शिवशंकर यांनी अधीक्षक व संबंधीत भोजन पुरवठा कंत्राटदाराला कारणे दाखवा नोटीस बजावली आहे. आदिवासी विकास विभागाच्या एकात्मिक आदिवासी विकास प्रकल्प गडचिरोली अंतर्गत २४ शासकीय आश्रमशाळा व १५ हून अधिक वसतिगृह चालविले जात आहेत. गेल्या काही दिवसांपासून प्रकल्प अधिकारी पी. शिवशंकर यांनी वसतिगृह व आश्रमशाळेतील वस्तूस्थिती जाणून घेण्यासाठी आकस्मिक गूप्त भेटी देण्याचा कार्यक्रम सुरू केला आहे. आरमोरी येथील शासकीय आदिवासी मुलांच्या वसतिगृहाची प्रवेश क्षमता २३५ आहे. ३ जानेवारी रोजी प्रकल्प अधिकारी पी. शिवशंकर यांनी रात्री ८ वाजता भोजनाच्यावेळी भेट दिली असता, या वसतिगृहात तब्बल ७९ विद्यार्थी गैरहजर असल्याचे दिसून आले. मात्र या वसतिगृहाचे अधीक्षक मैंद यांनी पटावरील रजिस्टरवर सर्वच २३५ विद्यार्थी हजर दाखविले असल्याचे आढळून आले. सदर वसतिगृहातील विद्यार्थी बायोमेट्रिक मशीनवर हजेरी नोंदवित नसल्याचेही भेटीदरम्यान आढळून आले. या संदर्भात पी. शिवशंकर यांनी विद्यार्थ्यांना विचारणा केली असता, बायोमेट्रिक मशीनवर योग्यप्रकारे थम्ब येत नसल्याचे कारण विद्यार्थ्यांनी पुढे केले. (स्थानिक प्रतिनिधी)
वसतिगृहावर प्रकल्प अधिकाऱ्यांची धाड
By admin | Updated: January 6, 2015 23:00 IST