अशोक नेते यांचे प्रतिपादन
गडचिरोली : गडचिरोली-चिमूर विधानसभा क्षेत्रामध्ये मागील अनेक दिवसापासून प्रलंबित असलेल्या समस्या सोडविण्यासाठी प्राधान्याने प्रयत्न करू, असे प्रतिपादन नवनियुक्त खासदार अशोक नेते यांनी पत्रकार परिषदेदरम्यान केले. देसाईगंज-गडचिरोली रेल्वेमार्गाला आपल्याच प्रयत्नाने मंजुरी मिळाली. निधी अभावी सदर रेल्वेमार्गाचे काम रखडले आहे. या मार्गासाठी निधी उपलब्ध करून देऊन सदर मार्ग पूर्ण करण्याचे भाग्यसुद्धा आपल्याला लाभणार आहे. त्याचबरोबर देसाईगंज ते मंचेरीयलपर्यंत रेल्वेमार्ग तयार करण्यासाठी प्रयत्न करू. जिल्ह्यातील ओबीसींचे आरक्षण पूर्ववत करणे, बंगाली समाजाच्या नागरिकांना जात प्रमाणपत्र मिळवून देणे, आपल्या कालावधीत मंजूर झालेल्या पाचही बंधार्‍याचे काम पूर्ण करणे, विद्यापीठासाठी जागा उपलब्ध करून देणे, अहेरी जिल्हा, घोट, आष्टी व पेंढरी यासारख्या तालुक्यांची निर्मिती करण्यासाठी प्रयत्न करणार. रखडलेले सिंचन प्रकल्प मार्गी लावण्यासाठी गडचिरोली जिल्ह्यासाठी वनकायदा शिथील करणे, उद्योग निर्मितीसाठी प्रयत्न करून बेरोजगार युवकांच्या हाताला काम देणे, नागभिड-नागपूर रेल्वेमार्गाचे ब्रॉडगेजमध्ये रूपांतर करण्यासाठी प्रयत्न करणार असल्याचे आश्वासन खा. अशोक नेते यांनी दिले. यावेळी बाबुराव कोहळे, रमेश भुरसे, सुधारकर येनगंदलवार, डेडूजी राऊत, अनिल करपे, अविनाश महाजन, अविनाश कुनघाडकर, अभिलाश विसरोजवार, प्रशांत वाघरे, प्रशांत भ्रृगुवार, गजानन येनगंदलवार, वामन ठाकरे, अविनाश पाल, भारत खटी यांच्यासह भाजपाचे पदाधिकारी उपस्थित होते. (नगर प्रतिनिधी) पत्रकार परिषदेला उपस्थित खा. अशोक नेते, रमेश भुरसे, बाबुराव कोहळे.