चौडमपल्लीत मोहफूल, चंदनखेडी देशीचा अड्डा

गडचिरोली पाठोपाठ चंद्रपूर जिल्ह्यातीलही दारू बंद झाल्याचा गैरफायदा उचलत दारूविक्रेत्यांनी तेलंगणा राज्यातून दारू आणणे सुरू केले आहे.

आष्टी : गडचिरोली पाठोपाठ चंद्रपूर जिल्ह्यातीलही दारू बंद झाल्याचा गैरफायदा उचलत दारूविक्रेत्यांनी तेलंगणा राज्यातून दारू आणणे सुरू केले आहे. आष्टी परिसरातील चौडमपल्ली हे मोहफूलाच्या दारूविक्रीचे तर चंदनखेडी हे देशी व विदेशी दारू मिळण्याचा अड्डा बनले आहे. या दोन्ही गावांमध्ये तळीरामांची सायंकाळच्या सुमारास जत्रा भरत असून यामुळे या दोन्ही गावांमधील शांतता भंग झाली आहे. चंद्रपूर जिल्ह्यात दारू सुरू असताना आष्टी परिसरातील तळीराम चंद्रपूर जिल्ह्यातील गोंडपिपरी तालुक्यातील तारसा येथे दारू पिण्यासाठी जात होते. या गावात देशी, विदेशी दारूची पाच दुकाने होती. हे गाव आष्टीपासून केवळ तीन किमी अंतरावर आहे. त्यामुळे आष्टी परिसरातील तळीरामांना खुलेआम दारू मिळत होती. मात्र १ एप्रिलपासून चंद्रपूर जिल्ह्यातही दारूबंदी झाल्याने या सर्व दुकांनाचे शटर बंद झाले आहे. परिणामी आष्टी परिसरातील तळीरामांची फार मोठी गोची झाली आहे. त्यामुळे तळीरामांनी आता आपला मोर्चा अहेरी मार्गावरील चंदनखेडी व चौडमपल्ली येथे वळविला आहे. चौडमपल्ली येथे मोहफुलाची दारू मूबलक प्रमाणात मिळत असून चंदनखेडी हे देशी व विदेशी दारूचा मुख्य अड्डा बनला आहे. परिसरातील गावांना याच गावातून दारूचा पुरवठा केला जात आहे. चंदनखेडी येथे आंध्रप्रदेशातून बैलबंडीच्या सहाय्याने नदीच्या मार्गाने दारू आणली जात आहे. मूबलक प्रमाणात दारू मिळत असल्याने या दोन्ही गावांकडे सायंकाळच्या सुमारास तळीरामांची रांग लागत असून गावाला जत्रेचे स्वरूप प्राप्त झाले आहे. तळीरामांमुळे या मार्गावर अपघातांचे प्रमाणही वाढले आहे. काही दिवसांपूर्वी दारू पिऊन वाहन चालविताना एक वाहन महांकाली मंदिराजवळ पलटल्याची घटना घडली आहे. या दोन्ही गावांमध्ये खुलेआम दारू विकली जात असताना पोलीस मात्र केवळ बघ्याची भूमिका बजावित आहेत. त्यामुळे पोलिसांच्या कार्यपद्धतीवरही प्रश्नचिन्ह उपस्थित होत आहे. (प्रतिनिधी)