कर्मचाऱ्यांना ग्रामपंचायत निवडणुकीचे प्रशिक्षण

काेरची : ग्रामपंचायत निवडणुकीसाठी प्रशासकीय यंत्रणा सज्ज झाली असून, त्यादृष्टीने मतदानासाठी केंद्राध्यक्ष, मतदान अधिकारी व कर्मचाऱ्यांचे प्रशिक्षण सुरू आहे. कोरची तालुक्यातील दुसरे प्रशिक्षण ६ जानेवारीला कोरची येथील तहसील कार्यालयाच्या सभागृहात पार पडले. या प्रशिक्षणात कर्मचाऱ्यांना निवडणूक प्रक्रियेबाबत मार्गदर्शन करण्यात आले. तहसीलदार तथा तालुका निवडणूक अधिकारी छगनलाल भंडारी यांच्या मार्गदर्शनाखाली प्रशिक्षण पार पडले. यावेळी कोरचीचे गटशिक्षणाधिकारी आबाजी आत्राम, तालुका कृषी अधिकारी भाऊसाहेब कटरे व ऑपरेटर निशिकांत खोब्रागडे यांनी कर्मचाऱ्यांना निवडणूक कार्यासंबंधी मार्गदर्शन केले. कर्मचाऱ्यांना मार्गदर्शन केल्यानंतर ईव्हीएमद्वारे प्रात्यक्षिक करून दाखविण्यात आले. यामध्ये कंट्रोल युनिट, बॉलेट युनिट जोडणी, अभिरूप मतदान, प्रत्यक्ष मतदान करतांना यंत्रात बिघाड झाल्यास उपाययोजना, मतदान प्रक्रिया, निवडणूक कामाविषयी कागदपत्रे, केंद्राध्यक्ष व मतदान अधिकारी यांचे कर्तव्य तसेच जबाबदाऱ्या याविषयी मार्गदर्शन करण्यात आले.