उपस्थितीच्या स्वाक्षऱ्या करून रात्री कर्मचारी गायब

तालुक्यातील प्राथमिक आरोग्य केंद्रातील कर्मचारी दैनंदिन हजेरीपत्रावर त्यांच्या वेळेप्रमाणे सह्या मारून गायब होत असल्याचा प्रकार

अहेरी : तालुक्यातील प्राथमिक आरोग्य केंद्रातील कर्मचारी दैनंदिन हजेरीपत्रावर त्यांच्या वेळेप्रमाणे सह्या मारून गायब होत असल्याचा प्रकार ३१ आॅगस्ट रोजी रात्रीच्या सुमारास उघडकीस आला. महागाव येथील रहिवासी लचमा वाघाडे याला ३१ आॅगस्टच्या रात्री ११ वाजता प्राथमिक आरोग्य केंद्रात भरती करण्यासाठी नेले असता, वाहनचालक व चौकीदार वगळता एकही कर्मचारी या ठिकाणी हजर नव्हता. वाघाडे यांना तत्काळ अहेरी उपजिल्हा रूग्णालयात हलविल्याने त्यांचे प्राण वाचले. महागाव येथील रहिवासी लचमा वाघाडे यांची मागील काही दिवसांपासून प्रकृती बिघडली आहे. २७ आॅगस्ट रोजी लचमा वाघाडे हे प्राथमिक आरोग्य केंद्रात उपचारासाठी गेले असता, त्यांच्या शरीरात केवळ दोनच एचबी रक्त असल्याचे निदान झाले. त्यानंतर त्यांना एक सलाईन व दोन गोळ्या देऊन घरी पाठविण्यात आले. तीन दिवसानंतर त्यांची प्रकृती अचानक बिघडली. त्यामुळे त्यांना महागाव येथीलच प्राथमिक आरोग्य केंद्रात उपचारासाठी नेण्यात आले. मात्र रात्रीच्या सुमारास एकही आरोग्य कर्मचारी उपस्थित नव्हता. या रूग्णालयात तीन डॉक्टर तीन परिचारिका व इतर कर्मचारी असे एकूण १९ कर्मचारी आहेत. निवासस्थानी बघितले असता, सर्व निवासस्थानांना कुलूप लावून असल्याचे दिसून आले. केवळ रूग्णवाहिकेचे चालक एस. यू. गेडाम व शिपाई टी. के. म्हशाखेत्री उपस्थित होते. लचमा वाघाडे यांची प्रकृती आणखी बिघडल्याने याच रूग्णालयातील एका परिचारिकेला लचमा वाघाडेच्या नातेवाईकांनी फोन केला असता, सदर परिचारिकेने रूग्णांना रूग्णालयात आणायची ही वेळ आहे काय? मी आता आलापल्ली येथे असल्याचे सांगून फोन बंद केला. वाहनचालक एस. यू. गेडाम यांनी वाघाडे यांना अहेरी उपजिल्हा रूग्णालयात भरती केले. त्यामुळे वाघाडे यांचे प्राण वाचले. महागाव प्राथमिक आरोग्य केंद्रांतर्गत सात गावे येतात. प्रसुतीच्या केसेस या ठिकाणी दाखल होत असल्याने किमान एक डॉक्टर व एक आरोग्य कर्मचारी रात्रीच्या सुमारास हजर असणे आवश्यक आहे. मात्र एकही कर्मचारी रात्री या रूग्णालयात उपस्थित राहत नसल्याचे अनेकवेळा सिध्द झाले आहे. (प्रतिनिधी)तक्रारीनंतरही आरोग्य विभागाकडून दखल नाहीमहागाव प्राथमिक आरोग्य केंद्राचे सर्वच कर्मचारी रात्रीच्या सुमारास आरोग्य केंद्रात राहत नाही. बहुतांश कर्मचारी अहेरी व आलापल्ली येथे मुक्कामी राहतात. सह्या मात्र जातेवेळी करून जातात. याबाबतची तक्रार जिल्हा परिषदेकडे स्थानिक नागरिकांनी अनेकवेळा केली आहे. ही बाब जिल्हा परिषद अध्यक्ष प्रशांत कुत्तरमारे यांच्याही लक्षात आणून देण्यात आली आहे. मात्र जिल्हा परिषदेने संबंधित कर्मचाऱ्यांवर कोणतीही कार्यवाही केली नाही. त्यामुळे कर्मचाऱ्यांची हिंमत वाढत चालली आहे. या अगोदर डॉक्टरांच्या अनुपस्थितीमुळे दोन गरोदर मातांच्या आरोग्य केंद्राच्या फाटकाजवळच प्रसुती झाल्या आहेत. आरोग्य कर्मचारी अनुपस्थितीत राहत नसल्याने रूग्णांना अहेरी रूग्णालयात हलवावे लागते. सर्व कर्मचाऱ्यांना निवासस्थानी व मुख्यालयी उपस्थित राहण्याचे निर्देश द्यावे, अन्यथा प्राथमिक आरोग्य केंद्राला कुलूप ठोकण्याचा इशारा भाजपा तालुका उपाध्यक्ष संजय अलोणे, सरपंच विनायक वेलादी, राजेश दुर्गे, चंद्रजी रामटेके, उमेश रामटेके, हुरूप अलोणे, शंकर झाडे यांनी दिला आहे.