लाेकमत न्यूज नेटवर्क
भेंडाळा : मिळालेल्या गुप्त माहितीच्या आधारे चामाेर्शीच्या नायब तहसीलदारांनी दाेटकुली घाटावर धाड टाकून रेतीची तस्करी करणाऱ्या एक ट्रक व दाेन ट्रॅक्टर जप्त केले.
चामोर्शी तालुक्यात गेल्या अनेक महिन्यांपासून दोटकुली व वाघोली घाट परिसरात मोठ्या प्रमाणात रेती व मुरुमाची चोरी केली जात आहे. अशातच दोटकुली घाटावरून रेतीची मोठ्या प्रमाणात चोरी होत असल्याची गोपनीय माहिती महसूल प्रशासनाचे नायब तहसीलदार डी.जी.दुधबळे यांना मिळताच त्यांनी रात्री १२ वाजताच्या दरम्यान आपल्या ताफ्यासह धाड टाकली. दरम्यान, या ठिकाणी रेतीने भरलेल्या पाच ट्रॅक्टरपैकी तीन ट्रॅक्टरधारक घाटावरच रेती खाली करून पळून गेले. उर्वरित दोन ट्रॅक्टर पकडण्यात आले. त्यानंतर, कृषी उत्पन्न बाजार समितीसमोर रेतीने भरलेला एक ट्रक पकडला. जप्त केलेली तीनही वाहने तहसील कार्यालयासमाेर उभी करण्यात आली आहेत. यामध्ये एमएच ३३ व्ही २४२३ क्रमांकाचा ट्रॅक्टर व दुसरा ट्रॅक्टर विनाक्रमांकांचा आहे. याशिवाय एमएच ४० एन ४४४३ क्रमांकाचा ट्रक जप्त करण्यात आला आहे. या कारवाईमुळे रेती तस्करांचे धाबे दणाणले आहेत.