गडचिरोली : गडचिरोली-चिमूर या अनुसूचित जमाती राखीव मतदार संघात भारतीय जनता पार्टी, शिवसेना, नाग विदर्भ आंदोलन समिती, रिपाइं (आठवले) व युवाशक्ती आघाडीचे उमेदवार अशोक महादेव नेते यांनी ऐतिहासिक विजय मिळविला आहे. त्यांनी भारतीय राष्ट्रीय काँग्रेस, राष्ट्रवादी काँग्रेस व पिरिपा आघाडीचे उमेदवार गडचिरोलीचे काँग्रेस आमदार डॉ. नामदेवराव दल्लुजी उसेंडी यांचा तब्बल २ लाख ३६ हजार ९७0 मतांनी पराभव केला व काँग्रेसकडे असलेला हा मतदार संघ भाजपाने आपल्या कब्ज्यात घेतला. सकाळी ८ वाजता इंदाळा येथील शासकीय तंत्रनिकेतन महाविद्यालयाच्या इमारतीत कडेकोट बंदोबस्तात मतमोजणीला सुरूवात झाली. पोस्टल मतमोजणीपासूनच आघाडीवर असलेल्या भाजप उमेदवार अशोक नेते यांनी शेवटच्या २६ व्या फेरीपर्यंत मतांची आघाडी कायमच ठेवली. गडचिरोली, आरमोरी, अहेरी, चिमूर, ब्रम्हपूरी, आमगाव या सहाही विधानसभा क्षेत्रामध्ये अशोक नेते यांनी प्रचंड आघाडी मिळवित काँग्रेस उमेदवाराचे पाणीपत केले. अशोक नेते यांना ५ लाख ३५ हजार ९८२, काँग्रेस डॉ. नामदेव उसेंडी यांना २ लाख ९९ हजार ११२ तर बसपाचे रामराव नन्नावरे यांना ६६ हजार ९0६, आम आदमी पक्षाचे डॉ. रमेशकुमार गजबे यांना ४५ हजार ४५८ मते मिळाली. भारतीय कम्युनिष्ट पक्षाचे प्रा. नामदेव कन्नाके यांना २२ हजार ५१२ मते मिळाली. तर बहुजन मुक्ती पार्टीचे दिवाकर पेंदाम यांना ३ हजार ७३0, आंबेडकर राईट पार्टी ऑफ इंडियाचे देवराव नन्नावरे यांना ६ हजार ६0६, रिपब्लीकन पार्टी ऑफ इंडियाचे अँड. प्रभाकर दडमल यांना ३ हजार ४२२, समाजवादी पार्टीचे विनोद नन्नावरे यांना ४ हजार २८७, तृणमूल काँग्रेसचे सतीश पेंदाम यांना ८ हजार १५६ तर अपक्ष बाबुराव दांडेकर यांना ६ हजार ४७0 यांना मते मिळाली. अशोक नेते यांना आमगाव विधानसभा क्षेत्रात २६ हजार ६२ मतांची आघाडी मिळाली आहे. आरमोरी विधानसभा क्षेत्रात ४२ हजार ६७७, गडचिरोली विधानसभा क्षेत्रात ६९ हजार ९, अहेरी विधानसभा क्षेत्रात ४३,६७३, ब्रम्हपूरी विधानसभा क्षेत्रात ३0,१६७, चिमूर विधानसभा क्षेत्रात २५,0५२ मतांची आघाडी मिळाली. या आघाडीच्या भरवशावर भाजपच्या ऐतिहासीक विजयाचा मार्ग सुकर झाला. गडचिरोली विधानसभा क्षेत्रात डॉ. उसेंडी यांना सर्वात मोठा फटका बसला आहे. (जिल्हा प्रतिनिधी)
भाजपने केला गड सर
By admin | Updated: May 17, 2014 00:13 IST