बिबट चामडे तस्करीचे धागेदोरे तेलंगणपर्यंत

आलापल्ली वन विभागांतर्गत कमलापूर वन परिक्षेत्रात कोरेपल्ली गावाजवळ बालाजी गावडे यांच्या शेतात बिबटाच चामडे

तीन आरोपींना अटक : सात लाख रूपयांत करणार होते सौदा, मात्र पाच लाखावरच अडला व्यवहार आलापल्ली : आलापल्ली वन विभागांतर्गत कमलापूर वन परिक्षेत्रात कोरेपल्ली गावाजवळ बालाजी गावडे यांच्या शेतात बिबटाच चामडे असल्याच्या माहितीच्या आधारावर वन विभागाने धाड घालून शेतातील माडंवावर बिबट्याचे चामडे उन्हात वाळत असताना जप्त केले. या प्रकरणात तीन आरोपींना ताब्यात घेण्यात आले असून या प्रकरणाचे धागेदोरे तेलंगण राज्यापर्यंत पसरले असल्याची शक्यता वन विभागाच्या सूत्रांनी व्यक्त केली आहे. या प्रकरणात आणखी काही आरोपींना अटक होण्याची शक्यता वर्तविली जात आहे. या प्रकरणात बालाजी इरपा गावडे, मुकूंदराव बापू सिडाम, लक्ष्मण बापू गावडे या तिघांना ताब्यात घेण्यात आले आहे. तर बिबट्याला मारणाऱ्या मुख्य आरोपीमध्ये सोमा इरपा गावडे, मल्लूनल्लू कोरके गावडे, कोरके मुक्का गावडे, सुरेश कोरके गावडे या चौघांचा समावेश असल्याचे वन विभागाच्या चौकशीत आढळून आले आहे. आलापल्लीचे उपविभागीय वन अधिकारी आर. एम. अग्रवाल यांना मिळालेल्या गुप्त माहितीनुसार कमलापूर वन परिक्षेत्रांतर्गत येणाऱ्या कोरेपल्ली गावाजवळील बालाजी गावडे यांच्या शेतात बिबट्याचे चामडे असल्याची माहिती मिळाली. त्या आधारावर आलापल्लीचे वन परिक्षेत्राधिकारी किरण पाटील, प्रभाकर आत्राम यांची चमू घटनास्थळी पोहोचली व त्यांनी तपासणी केली. बालाजी गावडेच्या शेतात मांडवावर एका बिबट्याचे चामडे उन्हात वाळत असल्याचे आढळून आले. बिबट्याची कातडी आपल्या ताब्यात घेऊन बालाजीचा शोध सुरू केला. बालाजी पेरमिली गावातील बँकेत गेल्याचे समजले. वन विभागाने आपले पथक पेरमिलीला पाठविले. तेथूनच बालाजीला पकडण्यात आले आणि त्याच वेळेत त्याच्या दोन साथीदारांचा फोन त्याला आला. वन विभागाच्या अधिकाऱ्यांनी बालाजीला तू आलापल्लीच्या पेट्रोलपंपावर उभा आहे, असे सांगण्यास सांगितले. त्यानंतर आलापल्लीच्या पेट्रोलपंपावर सापळा रचण्यात आला व तो तेथे येताच बालाजीने दोघांनाही ओळखले व तत्काळ राजाराम खांदला येथील मुकूंद बापू सिडाम याला ताब्यात घेण्यात आले. तेथून वन विभागाचे पथक राजाराम खांदला गावात पोहोचले. लक्ष्मण बापू गावडे यालाही ताब्यात घेण्यात आले. या तिघांची चौकशी केली असता, या संपूर्ण घटनेत कोरेपल्ली गावातील सोमा इरपा गावडे, मल्लूनल्लू कोरके गावडे, कोरके मुक्का गावडे, सुरेश कोरके गावडे या चौघांनी बिबट्याला मारण्यात मुख्य भूमिका बजाविल्याचे त्यांनी सांगितले. अधिक तपास मुख्य वनसंरक्षक प्रादेशिक एटबॉन, उपवनसंरक्षक चंद्रशेखर बाला यांच्या मार्गदर्शनात वन अधिकारी करीत आहेत. (प्रतिनिधी) अशी केली बिबटाची शिकार कोरेपल्ली गावाजवळ जंगलातील नाल्यात साचलेल्या पाण्यात विष टाकून बिबट्याला मारण्यात आले. नंतर त्या बिबट्याची संपूर्ण कातडी काढण्यात आली व त्या बिबट्याच्या हाडाचे व मांसाचे तुकडे जंगलात फेकून देण्यात आले. कोरेपल्लीजळील जंगलात मांस व हाड फेकून देण्यात आले व कातडी बालाजी इरपा याच्या शेतात आणण्यात आली व ही बिबटाची कातडी आहे. शेतात ठेव असे सांगितले. कातडी विकण्यासाठी ग्राहक शोधावे लागतील, असेही ठरविण्यात आले. बिबट्याची कातडी विकण्याच्या उद्देशाने या चौघांनी मुकूंद सिडाम व लक्ष्मण गावडे यांच्या मार्फत ग्राहकाचा शोध सुरू केला. त्यांनी तेलंगणा राज्यात एकाशी संपर्क केला व पाच लाख रूपये देण्याचे कबूल केले. मात्र कातडी विकणाऱ्या आरोपींना सात लाख रूपये हवे होते. त्यामुळे सौदेबाजी सुरू होती. त्यात हा व्यवहार अडकला. तेलंगणा राज्यातून कातडी घेणारा कोण होता व आणखी कुणाकुणाचा सहभाग आहे, याची माहिती वन विभागाचा पथक घेणार आहे.