उन्हाळ्यात शाॅक लागून जीवितहानी अथवा आग लागल्याने वित्तहानी संभवते. कूलरसाठी नेहमी थ्री-पिन प्लगचा वापर करावा. घरात अर्थिंग लिकेज सर्किट बेस बसवून घ्यावे. बाजारात हे उपकरण सहज उपलब्ध असून विजेचा धोका संभवताच विजेचा पुरवठा बंद होतो. घरातील अर्थिंग योग्य असल्याची तपासणी करून घेणे आवश्यक आहे.
कूलरच्या लोखंडी बाह्यभागात वीजपुरवठा येऊ नये, यासाठी कूलरचा थेट जमिनीसोबत संपर्क येईल, अशी व्यवस्था करावी. पाणी भरताना कूलरचा वीजपुरवठा बंद ठेवावा. कूलरमधील पाणी जमिनीवर पडणार नाही, याची काळजी घ्यावी. ओल्या हाताने कूलरला स्पर्श करू नये. ओल्या हाताने किंवा ओल्या जमिनीवर टिल्लू पंप सुरू करू नये. पंपातून पाणी येत नसेल तर पंपाचा वीजपुरवठा आधी बंद करावा. प्लग काढल्यानंतर पंपाला हात लावावा. पंप पाण्यात बुडाला नसल्याची खात्री करून घ्यावी. बरेचदा पाण्याची पातळी खोल गेल्याने पंप सुरू करूनही पाणी खेचले जात नाही. तो पंप एअर लाॅक होतो. अशावेळी प्रायमिंग करणे आवश्यक असते. बरेचदा अज्ञानामुळे चालू पंपाचे प्रायमिंग केले जाते. अशावेळी विजेचा शाॅक लागण्याची शक्यता राहते. त्यामुळे चालू पंपाचे प्रायमिंग करणे टाळावे, अशा प्रकारे खबरदारी घेणे गरजेचे आहे.