गडचिराेली : धानाेरा तालुक्याच्या दुधमाळा येथील मुक्तिपथ कार्यकर्ता अक्षय पेद्दीवार यांच्यावर काकडवेलीवासीयांनी केलेले दारूवाटपाचे आराेप पूर्णत: खाेटे आहे, असा ठराव दुधमाळा व फासीटाेला ग्रामसभेने पारित केला आहे.
दुधमाळा व फासीटोला ग्रामवासीयांनी ग्रामसभा ठराव घेऊन हे जाहीररीत्या मांडले आहे. एवढेच नाही तर आदिवासी सामाजिक कार्यकर्ते देवाजी तोफा, पोलीस निरीक्षक, धानोरा पोलीस स्टेशन, सर्च शोधग्रामचे संचालक डॉ. अभय बंग, संवर्ग विकास अधिकारी पंचायत समिती धानोरा, संचालक मुक्तिपथ अभियान यांना ग्रामसभेचा ठराव सादर करून आपले म्हणणे दोन्ही गावांनी मांडले आहे.
काकडवेलीमधील काही कुटुंबांनी ग्रामसभेचा चुकीचा वापर केला आहे. राजकीय द्वेषभावनेतून अक्षय पेद्दीवार यांच्यावर राग काढण्यात आला. एखाद्या व्यक्तीविरुद्ध द्वेष काढण्यासाठी ग्रामसभेचा वापर करू शकत नाही, असे त्यांनी नमूद केले. काकडवेली ग्रामसभा अध्यक्ष घन्सू दुगा व सचिव विश्वनाथ पदा यांनी ग्रामसभेचा हा चुकीचा वापर केल्याचा आरोप करत त्याकरिता ग्रामसभा महासंघाने काकडवेली ग्रामसभेवर कारवाई करावी, अशी मागणी दुधमाळा व फासीटोला गाववासीयांनी ठराव घेऊन केली आहे.
पेद्दीवार यांनी दारूवाटप केलेले नाही, तर काकडवेली येथील दारूबंदीकरिता स्वतः मुक्तिपथ चमू व काकडवेली गाव संघटनेच्या मदतीने प्रयत्न केले. ग्रा.पं. निवडणुकीत काकडवेली गटाचा एक उमेदवार निवडून येऊ शकणार नाही, असा अंदाज घेत हा व्यक्तिगत विरोध करण्यात आला आहे, असे दुधमाळा व फासीटोलावासीयांनी घेतलेल्या ठरावामध्ये नमूद केले आहे.
(बॉक्स)
मुक्तिपथ म्हणते, आमचा कार्यकर्ता निर्दोष
मुक्तिपथ अभियानाचा कार्यकर्ता अक्षय पेद्दीवार यांच्यावरील आरोपाच्या अनुषंगाने चौकशी करण्यात आली, त्यात सदर आरोपासंदर्भात कोणताही ठोस पुरावा मिळाला नाही. त्यामुळे आरोप पूर्णत: खोटे होते, असे आढळल्याचे मुक्तिपथचे संचालक डॉ. मयूर गुप्ता यांनी कळविले.