कुरखेडा (गडचिरोली) : गोंदिया येथे मित्राच्या लग्नसमारंभाहून परतताना भरधाव कार पुलावरून खाली कोसळली. यात दोघे जखमी झाले. ही घटना तालुक्यातील लेंडारी गावाजवळ १० मार्च रोजी पहाटे अडीच वाजेच्या सुमारास घडली. दरम्यान, अपघातानंतर कार लॉक झाली, त्यामुळे दोन्ही जखमी साडेतीन तास आत अडकले होते.
सरफराज खालीद शेख (वय २४ ,रा. शिरपूर जि.गोंदिया) व प्रणय पुरुषोत्तम उईके (वय २२, रा. गांगोली, ता.कुरखेडा) अशी जखमींची नावे आहेत. गोंदिया जिल्ह्यातील देवरी येथे हे दोघे मित्राच्या लग्नासाठी गेले होते. लग्नसमारंभ आटोपून ते परतत होते. लेंडारीजवळ १० मार्चला पहाटे अडीच वाजता भरधाव कार पुलावरून खाली कोसळली. यानंतर कार लॉक झाली, त्यामुळे दोन्ही जखमी आत अडकून पडले.
सकाळी सहा वाजता धावण्यासाठी आलेल्या मुलाने ही अपघातग्रस्त कार पाहिली व त्याने जखमींना कारमधून बाहेर काढले. कुरखेडा येथील सोहम कांबळे यांच्या वाहनातून दोन्ही जखमींना प्रथमोपचारानंतर पुढील उपचारासाठी ब्रह्मपुरी येथे हलविण्यात आले आहे.