ठळक मुद्देमेस्सीने सामन्याच्या 14व्या मिनिटाला दमदार गोल करत अर्जेंटीनाला पहिल्या सत्रात 1-0 अशी आघाडी मिळवून दिली.
मॉस्को : अटीतटीच्या लढतीत अर्जेंटीनासाठी संकटमोचक ठरतो तो लिओनेल मेस्सी आणि या गोष्टीचा प्रत्यय फुटबॉल विश्वचषकातील नायजेरियाविरुद्धच्या सामन्यातही आला. मेस्सीने सामन्याच्या 14व्या मिनिटाला दमदार गोल करत अर्जेंटीनाला पहिल्या सत्रात 1-0 अशी आघाडी मिळवून दिली.
सामन्याच्या सुरुवातीला अर्जेंटीनाकडून काही चुका झाल्या. पण काही मिनिटांत त्यांनी या चुका सुधारल्या. सामन्याच्या 14व्या मिनिटाला मेस्सीकडे चेंडू आला. त्याने तो चेंडू मांडीवर घेऊन पायाच्या बोटांवर आणला. त्यानंतर वेगात असलेल्या चेंडूला त्याने काही क्षण स्पर्शही केला नाही. गोल बनवण्यासाठी त्याने जागा बनवली आणि तिसऱ्या फटक्यात त्याने हा गोल केला. विश्वचषकातील हा शंभरावा गोल ठरला आहे.