"त्यांनी भोंदूबाबाचा सगळा प्रकार संवेदनशीलतेने हाताळला..."; प्राजक्ता माळीने मुख्यमंत्री देवेंद्र फडणवीस यांचं केलं कौतुक

मुंबईतील दादर येथे नारी शक्ती वंदन महिला संमेलनाचे आयोजन होताना दिसले. या प्रसंगी प्राजक्ताने मुख्यमंत्र्यांच्या कार्याचे जाहीर कौतुक केले.

प्राजक्ता माळी ही मराठी मनोरंजन विश्वातील लोकप्रिय अभिनेत्री. प्राजक्ता माळी अनेकदा जाहीर व्यासपीठावर स्वतःचं मत मांडताना दिसते. प्राजक्ताने नुकत्याच एका कार्यक्रमात महाराष्ट्राचे मुख्यमंत्री देवेंद्र फडणवीस यांचं जाहीर कौतुक केलं. मुंबईतील दादर येथे नारी शक्ती वंदन महिला संमेलनाचे आयोजन होताना दिसले. यावेळी प्राजक्ता माळी, रविना टंडन हे सेलिब्रिटी उपस्थित होते. या प्रसंगी प्राजक्ताने मुख्यमंत्र्यांच्या कार्याचे जाहीर कौतुक केले.

प्राजक्ता माळी म्हणते की, ''मी आवर्जुन उल्लेख करेल. आता महाराष्ट्रात जे काही घडत आहे, भोंदूबाबामुळे जे काही चाललेलं आहे, अतिशय संवेदनशीलतेने त्यांनी हा प्रकार हाताळला आहे. म्हणजे जिथे बापाप्रमाणे कठाेर व्हायला पाहिजे तिथे कठोर होतात. जिथे आईचं ममत्व पाहिजे तिथे त्या पद्धतीने त्या गोष्टी हाताळतात.''

प्राजक्ता माळी पुढे म्हणते, ''त्याचबरोबर ते जेव्हा माईकवर बोलतात. विशेषतः जेव्हा जेव्हा आपण त्यांना टीव्हीवर ऐकतो, पाहतो. तेव्हा त्यांच्यावर कितीही चिखलफेक होत असली, ट्रोलिंग होत असलं तरीही त्यांच्या वाणीतून कधीही चुकीचा शब्द बाहेर पडलेला नाही. मी आजपर्यंत कधीच ऐकला नाही. अहो चुकीचा शब्द सोडा त्यांचा सूर कधी ढळलेला मी पाहिला नाही.'', अशाप्रकारे प्राजक्ताने तिच्या भावना व्यक्त केल्या. प्राजक्ताच्या वर्कफ्रंटबद्दल सांगायचं तर ती सध्या 'महाराष्ट्राची हास्यजत्रा' या शोचं सूत्रसंचालन करत आहे