"शिव, मला तुझ्यासोबत घेऊन चल"; ३० वर्षीय अभिनेत्रीचं निधन, शेवटची पोस्ट पाहून चाहते भावुक

मनोरंजन विश्वातून एक दुःखद बातमी समोर येत आहे. प्रसिद्ध टीव्ही अभिनेत्री दिव्यांका सिरोहीच्या निधनामुळे मनोरंजन सृष्टीवर शोककळा पसरली आहे. दिव्यांकाच्या अकाली जाण्याने तिचे चाहते आणि कुटुंबियांना मोठा धक्का बसला आहे. दरम्यान दिव्याची शेवटची पोस्ट पाहून सर्वांना धक्का बसला आहे.

दिव्यांका सिरोही कृष्णाची मोठी भक्त होती. तिच्या इंस्टाग्राम प्रोफाईलवर तिने भगवान श्रीकृष्ण आणि महादेवाशी संबंधित अनेक पोस्ट शेअर केल्या होत्या.

दिव्यांकाच्या शेवटच्या पोस्टमध्ये तिने स्वतःचा फोटो पोस्ट करुन बी-प्राकचे 'बरसाना मिला है' हे गाणं बॅकग्राऊंडला ठेवलं होतं. ही पोस्ट पाहून दिव्यांका किती अध्यात्मिक होती याचा अनुभव तिच्या चाहत्यांना आला.

शिव, मला तुझ्यासोबत घेऊन चल, असं कॅप्शन देऊन दिव्यांकाने हा फोटो पोस्ट केला होता. ९ जून २०२३ ला दिव्यांकाने ही पोस्ट केली. त्यानंतर तीन वर्ष दिव्यांका सोशल मीडियापासून दूर असलेली दिसली.

दिव्यांकाने वयाच्या अवघ्या ३० व्या वर्षी जगाचा निरोप घेतला. हृदयविकाराच्या झटक्याने दिव्यांकाचे निधन झाले असा प्राथमिक अंदाज व्यक्त केला जात आहे.

फार कमी वयात दिव्यांकाचं निधन झाल्याने मनोरंजन विश्वातून आणि दिव्यांकाच्या चाहत्यांकडून हळहळ व्यक्त केली जात आहे. बुधवारी सकाळी तिच्या मूळ गावी तिच्यावर अंत्यसंस्कार करण्यात आले.

दिव्यांका हरियाणवी मनोरंंजन विश्वातील प्रसिद्ध अभिनेत्री होती. तिच्या रिल आणि फोटोंना चाहत्यांकडून लाईक्स आणि कमेंट्सच्या माध्यमातून प्रेम मिळायचं. दिव्यांकाच्या जाण्याने मनोरंजन विश्वातील कलाकारांनी शोक व्यक्त केला आहे.