धुळे : भरधाव वेगाने येणारी कार दुचाकीवर जाऊन आदळली. त्यात दुचाकीवरील दोघेही तरुण गंभीर जखमी झाले. रुग्णालयात उपचार सुरू असताना एकापाठोपाठ एक दोघांचाही मृत्यू झाला. ही घटना दोंडाईचानजीक मंगळवारी दुपारी घडली. विजय सुदाम भील आणि सतिष प्रकाश धनगर असे मृत तरुणांची नावे आहेत. दोंडाईचा पोलिसात फरार कारचालकाविरोधात गुन्हा दाखल झाला.
एमएच ०५ बीएस ०६८१ क्रमांकाची कार शहादाकडून दोंडाईचाकडे भरधाव वेगाने येत होती. पीरवल्ली दर्गाजवळ कार येताच एमएच १८ बीवाय ६०६५ क्रमांकाच्या दुचाकीला कार जावून धडकली. अपघाताची ही घटना मंंगळवारी दुपारी ४ ते साडेचार वाजेच्या सुमारास घडली. या अपघातात दुचाकीवरील दोघेही रस्त्यावर फेकले गेले. त्यांच्या डोक्याला आणि हाता-पायाला गंभीर दुखापत झाली. दुचाकीचेही मोठ्या प्रमाणावर नुकसान झाले. अपघातानंतर तातडीने दोघाही तरुणांना रुग्णालयात दाखल करण्यात आले. उपचार सुरू असताना एका पाठोपाठ एक याप्रमाणे दोघांचाी मृत्यू झाला. विजय सुदाम भील (वय ३३) आणि सतीश प्रकाश धनगर (वय ३१) (दोन्ही रा. चिमठाणे ता. शिंदखेडा) अशी दोघा तरुणांची नावे आहेत. या घटनेमुळे चिमठाणे गावावर शोककळा पसरली आहे.
याप्रकरणी शिंदखेडा तालुक्यातील चिमठाणे येथील दिलीप बाबुराव बागले (वय ५५) यांनी बुधवारी दुपारी २ वाजता दोडाईचा पाेलिस ठाण्यात भादंवि कलम ३०४ अ. २७९, ३३७, ३३८ सह मोटार वाहन कायदा कलम १८४, १३४/१७७ प्रमाणे गुन्ह्याची नोंद करण्यात आली. घटनेचाा तपास सहायक पोलिस निरीक्षक ताटीकोंडीलवार करत आहेत.