११ नंतर बाहेर पडल्यास होणार कोरोनाची चाचणी

भूम : कोरोनाचा वाढता प्रादुर्भाव रोखण्यासाठी शहरात सकाळी ११ वाजल्यानंतर विनाकारण फिरणाऱ्या नागरिकांची कोरोना चाचणी करण्याचा निर्णय प्रशासनाने घेतला आहे. या अनुषंगाने तयारीदेखील करण्यात आली आहे.

कोरोनाचा वाढता प्रादुर्भाव लक्षात घेऊन शासनाने राज्यात अनेक निर्बंध लावले आहेत. परंतु, बहुतांश नागरिक महत्त्वाचे काम नसतानाही मुक्तपणे वावरताना दिसत आहेत. यामुळे निर्बंध लावूनही कोरोनाचा संसर्ग वाढतच आहे. यामुळे पालिका गटनेते संजय गाढवे, वैद्यकीय अधीक्षक संदीप जोगदंड व भूम पोलीस ठाण्याचे साहाय्यक पोलीस निरीक्षक मंगेश साळवी यांच्या वतीने येथील ग्रामीण रुग्णालयात मंगळवारी बैठक घेण्यात आली. यात कोरोना संसर्ग रोखण्यासाठी करावयाच्या विविध उपाययोजनांबाबत चर्चा होऊन सकाळी ११ वाजल्यानंतर विनाकारण बाहेर फिरणाऱ्या नागरिकांची कोरोना चाचणी करण्याचा निर्णय घेण्यात आला. तसेच या उपक्रमाची सुरुवातदेखील करण्यात आली.

या कोरोना चाचणीत एखादा व्यक्ती पॉझिटिव्ह असल्यास त्याला परंडा रोडवरील कोरोना सेंटर येथे तातडीने दाखल करण्यात येणार आहे. या निर्णयाची अंमलबजावणी तातडीने सुरू करण्यात आली असून, पहिल्या दिवशी या पथकाच्या माध्यमातून दुपारी २ वाजेपर्यंत १५ नागरिकांची अँटिजेन तपासणी करण्यात आली. यामध्ये एकही रुग्ण निष्पन्न झाला नसल्याचे सांगण्यात आले. ही मोहीम नागरिकांचे आरोग्य निरोगी राहावे यासाठी सुरू केली आहे. ही मोहीम शहरातील प्रत्येक वाॅर्डात ३० एप्रिलपर्यंत राबविण्यात येणार आहे, अशी माहिती साहाय्यक पोलीस निरीक्षक मंगेश साळवी यांनी दिली.

कोट........

नागरिकांनी विनाकारण बाहेर फिरून आपल्यासह इतरांचाही जीव धोक्यात आणू नये, हाच या मोहिमेचा उद्देश आहे. यामुळे शहरातील नागरिकांनी या मोहिमेस सहकार्य करावे.

- संजय गाढवे, गटनेते

कोरोनाचा वाढता प्रादुर्भाव पाहता आजच्या स्थितीत बऱ्याच ठिकाणी नागरिकांना खासगी दवाखान्यातदेखील बेड उपलब्ध होत नाहीत. त्यामुळे नागरिकांनी या आजाराचे गांभीर्य लक्षात घेऊन घरातच थांबावे, यासाठी हा उपक्रम सुरू केला आहे. त्यामुळे नागरिकांनी विनाकारण घराबाहेर पडू नये.

- डॉ. संदीप जोगदंड, वैद्यकीय अधीक्षक