मलकापूरात नगरपालिका उपाध्यक्षांच्या वाढदिवस सोहळ्यात तरुणांनी नाचवल्या तलवारी

पोलिसांनी घटनास्थळी दाखल होत दोघांना अटक केली असून पाच तलवारी ताब्यात घेतल्या आहेत. 

मलकापूर (जि. बुलडाणा) : मलकापूर नगरपालिका उपाध्यक्षांच्या वाढदिवस सोहळ्यात काहींनी जोशात येऊन तलवारी नाचविल्याची खळबळजनक घटना बुधवारी रात्री घडली. पोलिसांनी घटनास्थळी दाखल होत दोघांना अटक केली असून पाच तलवारी ताब्यात घेतल्या आहेत. पालिकेचे उपाध्यक्ष हाजी रशिदखाँ जमादार यांचा वाढदिवस विद्यमान नगराध्यक्ष ॲड. हरीश रावळ यांच्यासह काँग्रेस नेत्यांच्या उपस्थितीत बुधवारी पार पडला. पारपेठ भागातील उर्दू शाळेच्या आवारात रात्री कार्यक्रम सुरू होता. तेवढ्यात काही उत्साही तरुण घटनास्थळी दाखल झाले. त्यांनी चक्क तलवारी नाचविल्या. या प्रकाराचा व्हिडीओ व्हायरल होताच शहरात खळबळ उडाली. माहिती होताच पोलीस निरीक्षक प्रल्हाद काटकर यांच्या आदेशानुसार पोलीस ताफा घटनास्थळी दाखल झाला होता.