पती-पत्नीमध्ये छोट्या मोठ्या गोष्टींवरून अनेकदा वाद होत असतात. काही वाद हे टोकाला जातात. विशेषत: हे नातं प्रेम आणि विश्वासावरच टिकून असतं. पण काही वेळी तिसरी व्यक्ती आयुष्यात आल्याने सर्वच बिघडतं. फसवणुकीमुळे नातंच संपतं. अशीच एक धक्कादायक घटना आता समोर आली आहे. बिहारच्या दरभंगामध्ये भररस्त्यात पती-पत्नीचा हाय व्होल्टेज ड्रामा पाहायला मिळाला.
महिलेने आपल्या पतीची रस्त्यावरच धुलाई केली. चपलेने धू-धू धुतलं. हा प्रकार पाहून आसपासचे लोकही हैराण झाले. एवढंच नाही तर पतीची धुलाई केल्यानंतर महिला त्याची कॉलर पकडून त्याला पोलीस ठाण्यात घेऊन गेली. येथे तिने संपूर्ण प्रकार सांगितला. ही घटना दरभंगाच्या लहेरियासराय ठाण्याच्या परिसरातील आहे. यात एक महिला आपल्या पतीवर लक्ष ठेवत याठिकाणी पोहोचली. महिलेला अशी माहिती मिळाली होती, की तिच्या पतीचे दुसऱ्या महिलेसोबत संबंध आहेत. इतकंच नाही तर त्याने गुपचूप दुसरं लग्नही केलं आहे.
मिळालेल्या माहितीनुसार, महिलेने पतीला दुसऱ्या महिलेसोबत पाहताच तिला राग अनावर झाला. तिने पतीला पकडून रस्त्यावरच मारहाण करण्यास सुरुवात केली. महिलेचा राग पाहून बचावासाठी तिच्या पतीने पळून जाण्याचा प्रयत्नही केला, मात्र तो यशस्वी झाला नाही. मारहाण करणाऱ्या महिलेनं सांगितलं की, तिचं 12 वर्षांपूर्वी लग्न झालं होतं, तिला तीन मुलं आहेत.
पतीने महिलेला मारहाण करून घराबाहेर हाकलून दिलं होतं. यानंतर त्यानं दुसरं लग्नही केलं. याबाबत माहिती मिळताच महिला पतीच्या शोधात येथे पोहोचली होती. या महिलेने पोलीस ठाण्यात लेखी तक्रार केली आहे, मात्र पोलीस कोणतीही कारवाई करत नसल्याचं महिलेचं म्हणणं आहे. दुसरीकडे, पहिल्या पत्नीसोबत राहत असतानाच पुन्हा दुसरं लग्न केल्याचं पतीनं मान्य केलं आहे. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"