अलीगड - गेल्या काही काळात पत्नीकडून पतीच्या अनेक घटना समोर आल्या आहेत. त्यात उत्तर प्रदेशातील अलीगड येथेही हा प्रकार उघडकीस आला आहे. इथल्या ऋषी कुमार नावाच्या पतीची पत्नीने प्रियकरासोबत मिळून हत्या केली आहे. या हत्येतील आरोपी प्रियकर हा नात्याने ऋषीचा चुलत भाऊ होता. पोलिसांनी जेव्हा हे प्रकरण समोर आले तेव्हा कुटुंबाच्या पायाखालची जमीन सरकली.
१७ जूनच्या रात्री ही घटना घडली. सध्या महिलेला पोलिसांनी ताब्यात घेतले असून फरार प्रियकराचा शोध सुरू आहे. लग्नाच्या आधीपासून महिलेचे पतीच्या चुलत भावासोबत प्रेमसंबंध होते. ३० वर्षीय ऋषी कुमार याची १७ जूनला गोळी मारून हत्या केली होती. त्याचा मृतदेह १८ जूनला घरापासूनच दूर अंतरावर सापडला. या युवकाच्या कानामागे गोळी लागली होती. ऋषीची पत्नी ललिता हिने पतीच्या हत्येनंतर बनाव रचला. गावातील एका व्यक्तीचा मोबाईल चोरीला गेला होता, त्याचा ऋषीवर आरोप लावला. त्यावरूनच त्या व्यक्तीने ऋषीची हत्या केली असावी असा संशय ललिताने पोलीस तक्रारीत व्यक्त केला.
तपासात समोर आलं सत्य
१९ जूनला पोस्टमोर्टमनंतर मृतदेह कुटुंबाला सोपवला. त्याच्यावर अंत्यसंस्कार करण्यात आले. परंतु तपासात पोलिसांना वेगळीच शंका आली. मृत ऋषीची पत्नी ललिता हिचे कुटुंबातील दीरासोबत प्रेमसंबंध होते. परंतु या दोघांनी लग्न केले नाही. ऋषीच्या लग्नानंतर या दोघांचे भेटणे सुरूच होते. त्याची भनक ऋषीला लागली. त्यानंतर ललिताने दीरासोबत मिळून पती ऋषीला कायमचे संपवण्याचा कट रचला.
१० दिवसांपूर्वीच घरी आला होता
ऋषी तीन भावांमध्ये सगळ्यात मोठा होता. त्याचे २ वर्षापूर्वी लग्न झाले होते. आई वडिलांचे आधीच निधन झाले होते. ऋषी ट्रकचालक होता. हरियाणात तो ट्रक चालवून कुटुंबाचा उदरनिर्वाह करायचा. अलीकडेच काकाच्या मुलाच्या लग्नासाठी तो १० दिवसांपूर्वी गावी आला होता. पती बाहेर असताना पत्नी तिच्या माहेरी राहायची. अवैध संबंधातून ऋषीची हत्या झाली असावी असा संशय काही गावकऱ्यांनी व्यक्त केला होता. पोलिसांनी तपास केला असता ऋषीच्या पत्नीचे विवाहबाह्य संबंध असल्याचे समोर आले. त्यातूनच प्रियकराच्या मदतीने ऋषीची हत्या केल्याचे उघड झाले.