कोप्पल - एका बेकरीचं दुकान रोजसारखं शांत होते, परंतु ३१ मे रोजी संध्याकाळी त्या जागी अचानक क्रूर हत्याकांड घडले त्यामुळे सगळेच हादरले. कोप्पल जिल्ह्यातील एका व्यक्तीचा सात जणांनी मिळून चाकू आणि दांडक्याने खून केला. ही पूर्ण घटना सीसीटीव्ही कॅमेऱ्यात कैद झाली जी पाहून बघणाऱ्याच्या अंगावर काटा आला.
या हत्येतील मृतकाचे नाव चेनप्पा नरिनाल असं आहे. व्हिडिओत स्पष्टपणे चेनप्पा स्वत:चा जीव वाचवण्यासाठी बेकरीत शिरताना दिसतात, परंतु हल्लेखोर त्याच्यामागोमाग तिथे दाखल होतात. एक गुंड चेनप्पा यांच्या डोक्यात दांडक्याने वार करतो तर इतर दोघे त्यांच्यावर चाकूने हल्ला सुरू करतात. चेनप्पाची अवस्था इतकी खराब होती की त्यांच्या शरीरावर प्रत्येक ठिकाणी जखमा आणि रक्त वाहत होते. चेनप्पा जीव वाचवण्यासाठी धडपडत होते परंतु हल्लेखोरांनी त्यांना सोडले नाही. चेनप्पा कसे बसे बेकरीतून बाहेर पडले तरीही हल्लेखोरांनी पाठलाग करत त्यांच्यावर चाकू हल्ला केला.
चेनप्पाच्या हत्येनंतर आरोपी तिथून पसार झाले. त्यानंतर या घटनेची माहिती पोलिसांना मिळताच त्यांनी तातडीने तपास सुरू केला. या घटनेतील ७ आरोपींना अटक करण्यात पोलिसांना यश आले. या आरोपींमध्ये रवी, प्रदीप, मंजूनाथ, नागराज, गौतम आणि प्रमोद यांचा समावेश होता. या हत्येमागे जुना वाद आणि मालमत्तेचे कारण असल्याचे समोर आले आहे. सध्या पोलीस या घटनेतील इतर आरोपींचा शोध घेत आहेत. वरिष्ठ अधिकाऱ्यांनी घटनास्थळी पाहणी करून तपासाची सूत्रे वेगाने फिरवली. या घटनेतील आरोपींविरोधात कठोर पुरावे शोधण्याचं काम पोलीस करत आहेत.
नेमकं काय घडलं?
३१ मे रोजी रात्री १० च्या सुमारास ७ जण तलवार, चाकू आणि दांडके घेऊन एका बेकरी शॉपमध्ये घुसतात. तिथे एका व्यक्तीवर हल्ला करतात. या हल्ल्यात चेनप्पा यांच्या गळ्यावर, पाठीवर, डोक्यासह शरीरावर वार करतात. त्यात घटनास्थळी त्यांचा मृत्यू होतो. चेनप्पाच्या मृत्यूनंतर हल्लेखोर तिथून पसार होतात. ज्याठिकाणी ही घटना घडली तिथूनच १ किमी अंतरावर पोलीस स्टेशन आहे. चेनप्पा हा मोलमजुरी करणारा होता. या घटनेमुळे परिसरात दहशत पसरली. काही जण त्यांच्या फोनमधून व्हिडिओ काढत होते. पोलिसांनी या घटनेतील सर्व आरोपींवर हत्येचा गुन्हा दाखल केला आहे.