उत्तर प्रदेशातील उन्नाव जिल्ह्यात कारने धडक दिल्याची घटना समोर आली आहे. भरधाव वेगात असलेल्या XUV कारने रस्त्याच्या कडेला हातगाडी घेऊन चालत असलेल्या वृद्ध जोडप्याला धडक दिली. अपघात एवढा मोठा होता की, हातगाडी पलटी होऊन वृद्ध दाम्पत्य रस्त्यावर पडून गंभीर जखमी झाले. जखमी दाम्पत्याला उपचारासाठी रुग्णालयात दाखल करण्यात आले आहे.
हातगाडीला धडक दिल्यानंतर भरधाव वेगाने जाणारी कार निघून गेल्याचे व्हिडिओमध्ये स्पष्टपणे दिसत आहे. धक्कादायक बाब म्हणजे भाजपा नेत्याच्या गाडीने धडक दिल्याची माहिती तपासात समोर आली आहे. मिळालेल्या माहितीनुसार, ही घटना उन्नाव सदर कोतवाली भागातील आदर्श नगर परिसरातील आहे. सदर कोतवाली परिसरात भारत पेट्रोल पंपासमोर पाणीपुरी विकणारे शिवलाल गौतम हे पत्नी कृष्णावती गौतमसोबत काम आटोपून घरी परतत होते.
आदर्श नगर येथील रहिवासी असलेल्या या दाम्पत्याला मंगळवारी 7 फेब्रुवारी रोजी रात्री काळ्या रंगाच्या XUV-300 ने जोरदार धडक दिली, त्यामध्ये पती-पत्नी गंभीर जखमी झाले. अपघातानंतर काही वेळातच स्थानिक लोकांची गर्दी घटनास्थळी जमा झाली आणि लोकांनी जखमी वृद्ध जोडप्याला जिल्हा रुग्णालयात दाखल केले. त्याचवेळी पोलिसांनी अज्ञाताविरुद्ध गुन्हा दाखल केला.
अपघाताचा सीसीटीव्ही व्हिडिओ सोशल मीडियावर जोरदार व्हायरल होऊ लागला आणि ही बातमी पसरताच पोलिसांनी वाहन मालकाचा शोध सुरू केला. हे वाहन भाजपा नेते धनंजयसिंह चंदेल यांचे असल्याचे पोलिसांना कळताच त्यांनी जखमी दाम्पत्याला आर्थिक मदत, उपचार व इतर मदतीचे लेखी आश्वासन दिले. एका हिंदी वेबसाईटने याबाबतचे वृत्त दिले आहे.
सर्व ठळक बातम्यांसाठी जरूर वाचा महाराष्ट्रातील अव्वल मराठी वेबसाईट "लोकमत डॉट कॉम"