पत्नीनेच पुसलं स्वतःच कुंकू! ४० हजारांची सुपारी देऊन पतीचा काटा काढला; 'असा' झाला खुलासा

पतीच्या सततच्या नशेबाजीला आणि मारहाणीला कंटाळून पत्नीनेच त्याच्या हत्येचा कट रचल्याचे पोलीस तपासात निष्पन्न झाले आहे.

उत्तर प्रदेशातील उन्नाव जिल्ह्यात घडलेल्या श्रीकांत हत्याकांडामुळे संपूर्ण परिसर हादरून गेला आहे. पतीच्या सततच्या नशेबाजीला आणि मारहाणीला कंटाळून पत्नीनेच त्याच्या हत्येचा कट रचल्याचे पोलीस तपासात निष्पन्न झाले आहे. केवळ ४० हजार रुपयांची सुपारी देऊन सुखरानी नावाच्या महिलेने आपल्या कुंकवाचा बळी दिला. पोलिसांनी याप्रकरणी पत्नीसह दोन सराईत शूटर्सना बेड्या ठोकल्या असून, एका 'कॉल डिटेल रेकॉर्ड'मुळे या गुन्ह्याचा छडा लागला आहे.

शेतात नेले अन् आवळला गळा!

चमरौली येथील रहिवासी असलेल्या ३५ वर्षीय श्रीकांत लोधी यांचा मृतदेह गुरुवारी एका शेतात हात बांधलेल्या अवस्थेत आढळून आला होता. श्रीकांतची गळा दाबून हत्या करण्यात आली होती. सुरुवातीला हे प्रकरण अज्ञात हल्लेखोरांचे वाटत होते, मात्र श्रीकांतची आई सुंदारा यांनी सून सुखरानीवर संशय व्यक्त केल्याने पोलिसांनी तपासाची चक्रे फिरवली.

त्या 'दोन' फोन नंबरनी घात केला!

अजगैन पोलिसांनी तपास सुरू केल्यावर सुखरानीच्या फोनचे कॉल डिटेल्स तपासले. तपासात धक्कादायक माहिती समोर आली की, सुखरानी दोन अनोळखी तरुणांच्या सतत संपर्कात होती. पोलिसांनी चमरौली-दौलतखेडा मार्गावर सापळा रचून सुखरानीसह अंकित यादव आणि मोहित सिंह या दोन आरोपींना ताब्यात घेतले. पोलिसी खाक्या दाखवताच सुखरानीने आपला गुन्हा कबूल केला.

असा रचला हत्येचा कट

सुखरानीने पोलिसांना सांगितले की, श्रीकांत रोज दारू पिऊन तिला मारहाण करायचा. या त्रासातून सुटका करून घेण्यासाठी तिने ४० हजार रुपयांत श्रीकांतला संपवण्याचा व्यवहार ठरवला. मंगळवारी तिने गोड बोलून श्रीकांतला राजेश नावाच्या व्यक्तीच्या शेतात नेले. तिथे आधीच दबा धरून बसलेल्या अंकित आणि मोहितने श्रीकांतला गाठले, त्याचे हात बांधले आणि क्रूरपणे गळा आवळून त्याची हत्या केली.

आरोपी गजाआड

पकडण्यात आलेले शूटर अंकित आणि मोहित हे सराईत गुन्हेगार असून त्यांच्यावर यापूर्वीही अनेक गुन्हे दाखल आहेत. पोलिसांनी त्यांच्याकडून हत्येसाठी वापरलेले मोबाईल आणि सुपारीच्या रकमेतील १०,९५० रुपये जप्त केले आहेत. सध्या या तिन्ही आरोपींची रवानगी तुरुंगात करण्यात आली असून पोलीस पुढील तपास करत आहेत.