पाटणा: अनेकदा ट्रेनमध्ये तिकिट चेक करणाऱ्या TTE सोबत प्रवाशांनी गैरवर्तन केल्याचे किस्से तुम्ही ऐकले असतील. पण, बिहारमध्ये पवन एक्स्प्रेसमध्ये दोन TTE ने प्रवाशालाच बेदम मारहाण केल्याची घटना घडली आहे. ट्रेनच्या जनरल डब्यात वरच्या सीटवर बसलेल्या एका प्रवाशाला दोन टीटीईंने खाली ओढलं आणि लाथांनी तुडवलं. या घटनेचा व्हिडिओ सोशल मीडियावर व्हायरल झाला आहे. यानंतर दोन्ही टीटीईंना निलंबित करण्यात आलं आहे. पवन एक्सप्रेस गाडी जयनगरहून मुंबईकडे जात होती. दोन्ही TTE समस्तीपूर रेल्वे विभागाच्या जयनगर रेल्वे स्थानकावर कार्यरत आहेत.
वाद इतका वाढला की, टीटीनं प्रवाशाला ओढून खाली पाडलं लाथांनी तुडवलं. यावेळी त्या प्रवाशाच्या छातीवर आणि चेहऱ्यावर अनेकदा लाथा मारण्यात आल्या. काही वेळानंतर आजूबाजूला उपस्थित असलेल्या प्रवाशांनी आरडाओरडा करत टीटीईला रोखलं. पीडित प्रवासी बेशुद्ध झाल्यावर मारहाण थांबवली. ट्रेनमध्ये उपस्थित असलेल्या एका प्रवाशाने या संपूर्ण घटनेचा व्हिडिओ बनवला. लाइव्ह हिंदुस्थाननं हे वृत्त दिलं असून, व्हिडिओ शेअर केला आहे.