उल्हासनगर : मोर्यानगरी आशेळेगावातील आरती अपार्टमेंट इमारतीमध्ये पाकिस्तान प्रीमियम लीगच्या पेशावर जालमी व क्वेटा ग्लडिटर या दोन संघावर क्रिकेट सट्टावर लावणाऱ्या तिघांना पोलिसांनी रंगेहाथ अटक केली. याप्रकरणी विठ्ठलवाडी पोलीस ठाण्यात गुन्हा दाखल झाला असून क्रिकेट सट्टाची चर्चां सुरु झाली.
उल्हासनगरात क्रिकेट सट्टाची चर्चा असून यापूर्वी क्रिकेट सट्टेबाजावर पोलिसांनी कारवाई करून अटक केली. विठ्ठलवाडी पोलीस ठाण्याच्या हद्दीत पाकिस्तान प्रीमियर लीगमधील क्रिकेट सामन्यावर क्रिकेट सट्टा सुरू असल्याची गुप्त माहिती विठ्ठलवाडी पोलिसांना मिळाली. मोर्यानगरी आशेळेगाव येथील आरती अपार्टमेंट मधील तिसऱ्या मजल्यावर शनिवारी रात्री साडे दहा वाजता पोलिसांनी धाड टाकली. यावेळी मोबाईल फोनवर राम ताराचंद नागदेव, संजय मंगुमल हरदासानी व महेंद्र मनोहरलाल पंजाबी हे तिघे जण पाकिस्तान प्रीमियम लीग मध्ये पेशावर जालमी व क्वेटा ग्लडीटर या दोन संघा मधील सामन्यावर सट्टा खेळत असल्याचे मिळून आले. पोलिसांनी त्यांची झाडाझडती घेऊन अटक केली असून अधिक तपास करीत आहेत.
शहरात विविध ठिकाणी क्रिकेट सट्टा खेळला जात असून त्या अड्ड्यावर कारवाई करण्याची मागणी होत आहे. यापूर्वीही क्रिकेट सट्टा खेळणाऱ्यावर पोलिसांनी अटक केली. शहरात गुन्हेगारीत वाढ झाली असून जुगार व क्रिकेटचा सट्टा बहरल्याची टीका शहरातून होत आहे.