९० लाखांची चोरी, 'मास्टरमाईंड' नोकरच निघाला; सीक्रेट लॉकरची माहिती अन् रचला 'तो' भयानक कट!

पोलिसांनी आरोपींकडून सोने-चांदीचे दागिने, महागडे आयफोन आणि तीन लाख रुपयांची रोकड जप्त केली आहे.

मध्य प्रदेशची राजधानी असलेल्या भोपाळ शहराला हादरवून सोडणाऱ्या ९० लाख रुपयांच्या हाय-प्रोफाइल चोरीचा अखेर पोलिसांनी पर्दाफाश केला आहे. या प्रकरणात पोलिसांनी तीन आरोपींना अटक केली असून, या चोरीचा मास्टरमाईंड हा त्याच घरात काम करणारा माजी केअरटेकर असल्याचे उघड झाले आहे. आयएमईआय नंबरने पोलिसांना या तपासात मोठे यश मिळवून दिले आहे.

पोलिसांनी आरोपींकडून सोने-चांदीचे दागिने, महागडे आयफोन आणि तीन लाख रुपयांची रोकड जप्त केली आहे. जप्त केलेल्या ऐवजाची किंमत अंदाजे ७० लाख रुपये इतकी आहे.

चोरी कधी आणि कुठे झाली?

भोपाळमधील हबीबगंज पोलीस ठाण्याच्या हद्दीतील अशोका सोसायटी, अरेरा कॉलनी येथे ही घटना घडली होती. आर्किटेक्ट मनीष ब्यौहार हे त्यांच्या कुटुंबीयांसोबत मुंबईत राहतात. त्यांनी जुलै २०२५ मध्ये आपल्या अरेरा कॉलनीतील घरात सोने-चांदीचे लाखो रुपयांचे दागिने ठेवले होते. ते २२ नोव्हेंबर रोजी भोपाळला परतले तेव्हा त्यांना चोरी झाल्याचे समजले.

नोकरानेच रचला 'गुप्त लॉकर' लुटण्याचा कट!

चोरीच्या तपासासाठी पोलिसांनी ४० हून अधिक सीसीटीव्ही फुटेज तपासले. सुरवातीला पोलिसांना हा बाहेरच्या टोळीचे काम वाटले, पण तांत्रिक पुरावे आणि फुटेजमुळे धक्कादायक सत्य समोर आले. सोहित उर्फ ​​कल्लू हा ब्यौहार यांच्याकडे २०२३ पर्यंत केअरटेकर म्हणून काम करत होता. सोहितने कामावर असताना घरातील गुप्त लॉकर पाहिले होते. ही गुप्त माहिती वापरून सोहितने सध्याच्या केअरटेकरचा नातेवाईक असलेल्या रवी सोनी याच्यासोबत चोरीचा संपूर्ण कट रचला.

२९ जुलैच्या रात्री रवी आणि सोहितने नियोजनबद्ध पद्धतीने बाउंड्री वॉलवरून चढून पहिल्या मजल्यावर प्रवेश केला आणि लॉकरमधील रोख रक्कम व दागिने घेऊन पोबारा केला. आरोपींनी चोरी करण्यापूर्वी अनेक वेळा घराची रेकी केली होती.

IMEI नंबरने पकडले गेले आरोपी!

चोरी केल्यानंतर आरोपींनी सहा वेळा आपले ठिकाण बदलले. पोलीस आरोपींचा माग काढत असताना त्यांना महत्त्वाचा सुगावा लागला. आरोपी रवीने चोरीच्या पैशातून एक नवीन मोबाइल खरेदी केला होता. पोलिसांनी या नवीन मोबाइलच्या आयएमईआय नंबरच्या आधारे आरोपींचे लोकेशन शोधले आणि गुना येथून रवी सोनी, राजू सोनी आणि सोहित उर्फ ​​कल्लू या तिघांना अटक केली. पोलिसांनी त्यांच्याकडून सोन्याची बिस्किटे, बांगड्या, गोल्ड मेडल, चेन आणि ३ लाख रुपये रोख तसेच चोरीच्या पैशांतून खरेदी केलेला आयफोन जप्त केला आहे.