- मंगेश कराळे
नालासोपारा : वाघराळपाडा येथे सोमवारी एकाची पोटावर धारदार चाकूने वार करत हत्या करून मृतदेह फेकून दिला होता. याप्रकरणी वालीव पोलिसांनी हत्येचा गुन्हा दाखल केला होता. ही हत्या कोणी व का केली? याचा तपास करून गुन्ह्याचा छडा लावण्याचे मोठे आव्हान वालीव पोलिसांसमोर उभे टाकले होते.
गुन्हे प्रकटीकरण शाखेच्या पोलिसांनी आरोपीला बिहार राज्यात गावाला पळून जाण्याच्या तयारीत असताना पकडले आहे. सदर गुन्ह्यातील आरोपीताचा शोध घेण्यासाठी वरिष्ठ पोलीस अधिकाऱ्यांनी दिलेल्या सुचनांप्रमाणे वालीव पोलीस ठाण्याच्या गुन्हे प्रकटीकरण शाखेचे अधिकारी व अंमलदार यांची पथके तयार करण्यात आली.
आरोपीचा शोध घेत असताना तंत्रिक विश्लेषन व गुप्त बातमीदाराकडून मिळालेल्या माहितीच्या आधारे गुन्हयातील संशयित सुजित रामनारायण चौधरी (२६) याला राजीवली, वाघराळपाडा या परिसरातून ताब्यात घेऊन त्याच्याकडे गुन्ह्याच्या अनुषंगाने कौशल्यपूर्ण चौकशी केली.
आरोपीने कबुली दिली की, घटनास्थळावर दोघांमध्ये किरकोळ वादातुन व शिवीगाळीतुन आरोपीत याने कोंडीराम वाघमारे याचा खुन केल्याची कबुली दिली. आरोपी यास सदर गुन्ह्यात अटक करण्यात आली असून तपास वरिष्ठ पोलीस निरीक्षक कैलास बर्वे करीत आहेत.