मुंबई : जेवण घेताना झालेला किरकोळ वाद एकाच्या जिवावर बेतला. गोरेगावच्या वनराई परिसरात तरुणाचा खून करण्यात आला. याप्रकरणी पोलिसांनी मारेकऱ्याला अटक केली आहे.
तेजबहादूर रामलखन मौर्य (४५) असे अटक करण्यात आलेल्या इसमाचे नाव आहे. गोरेगाव वाइन शॉपसमोर हनुमान टेकडी मुलुंड लिंक रोड या ठिकाणी एक चायनीज अन्नपदार्थ विकणारे दुकान आहे. या घटनेबाबत मिळालेल्या माहितीनुसार, मयत इसम मुकेश रमेश झांजरे (३२) आणि मौर्य यांच्यात बऱ्याच वर्षांपासून खासगी वाद होते. त्यानुसार आरोपी २५ ऑक्टोबर रोजी चायनीजच्या दकानावर जेवण घेण्याकरिता आला.
त्यावेळी झांजरे आधीच त्या ठिकाणी हजर होता. त्यावेळी पुन्हा काही कारणावरून दोघांची एकमेकांसोबत बाचाबाची सुरू झाली. त्यात झालेल्या भांडणात आरोपीने मयताला हाताने धक्काबुक्की सुरू केली आणि नंतर त्याच्याजवळ असलेल्या स्टीलच्या चाकूने मयताच्या छातीवर व पोटात चाकूने त्याच्यावर हल्ला चढवत त्याला जखमी केले.
स्थानिकांनी हा प्रकार पाहिला आणि तातडीने झांजरे यांना रिक्षाने जोगेश्वरी पूर्व येथे असलेल्या ट्रामा केअर रुग्णालय नेले. जिथे रात्री साडेबाराच्या सुमारास त्याला डॉक्टरांनी मयत घोषित केले. याप्रकरणी पोलिसांनी मारेकऱ्याला अटक करत खुनासाठी वापरलेला चाकू देखील हस्तगत केला.