पोलिसांच्या तावडीतून वाचण्यासाठी आजकाल गुन्हेगार वेगवेगळ्या आयडिया वापरतात. अशीच एक घटना तेलंगणामधून समोर आली आहे. इथे एका व्यक्तीने महिलेच्या गेटअपमध्ये चोरी केली. तो त्याच्या पत्नीचा नाइट ड्रेस आणि विग घालून दुकानात शिरला आणि त्याने चोरी केली. ही पूर्ण घटना सीसीटीव्ही कॅमेरात कैद झाली. त्यानंतर 48 तासात पोलिसांनी त्याला ताब्यात घेतलं.
पोलिसांनुसार, सिंगाराम गावात राहणाऱ्या गनागोनी बंटी येलारेड्डी पेठेतील एका बिल्डींगच्या रूममध्ये लक्ष्मी नारायण फ्लेक्स प्रिंटिंग नावाने व्यवसाय चालवतात. या बिल्डींगचा मालक रामिंदला नामपल्लीचा मुलगा रामिंदला सुधीरही पत्नीसोबत याच बिल्डींगमध्ये राहतो. सुधीरला नशेची सवय आहे आणि ती पूर्ण करण्यासाठी त्याच्याकडे पैसे नाहीत. याच कारणाने त्याने बंटीच्या दुकानात चोरी केली.
9 सप्टेंबरच्या रात्री बंटी सगळी कामे करून दुकान बंद करून घरी गेला. त्यानंतर सुधीर आपल्या पत्नीचा नाइट ड्रेस आणि विग घालून खालच्या दरवाज्यातून दुकानात शिरला. त्याने काउंटरमध्ये ठेवलेले 3 हजार 500 रूपये घेतले आणि तिथून निघून गेला. बंटीने 11 सप्टेंबरला दुकान उघडलं तर त्याला पैसे गायब असल्याचं दिसलं. त्याने पोलिसात तक्रार दिली.
CCTV फुटेजने केली पोलखोल
चौकशी दरम्यान पोलिसांनी दुकानातील सीसीटीव्ही फुटेज चेक केलं. त्यात एक महिला पैसे चोरी करताना दिसली. यानंतर सुधीरची चौकशी केली गेली. त्यावेळी पोलिसांना त्याच्यावर संशय आला. त्याला ताब्यात घेण्यात आलं. तेव्हा कुठे त्याने त्याचा गुन्हा कबूल केला. सुधीर म्हणाला की, पकडलं जाऊ नये म्हणून त्याने पत्नीचा विग आणि कपडे घातले होते.