नवी दिल्ली - राजधानी दिल्लीतील नेहा हत्याकांडाने सगळ्यांनाच हैराण केले आहे. या घटनेतील आरोपी तौफीक नेहाच्या बिल्डिंगमध्ये बुरखा घालून गेला होता. त्याने नेहाच्या वडिलांसमोरच त्यांच्या मुलीला पाचव्या मजल्यावरून धक्का दिला. नेहाला उपचारासाठी हॉस्पिटलमध्ये दाखल करण्यात आले परंतु दुर्दैवाने तिने अखेरचा श्वास घेतला. या प्रकारात आरोपी तौफीकला पोलिसांनी अटक केली आहे परंतु या घटनेचा तपास केला असता वेगवेगळे खुलासे समोर येत आहेत.
दिल्लीच्या गुरू तेज बहादूर सिंह हॉस्पिटलबाहेर नेहाचे वडील अत्यंत भावूक अवस्थेत पाहायला मिळाले. त्यांच्या डोळ्यातून पाणी थांबण्याची चिन्हे नाहीत. नेहाचे वडील सुरेंद्र कुमार यांनी सांगितले की, माझ्या मुलीला फक्त न्याय हवा. नेहाने अलीकडेच एका कंपनीत काम करणे सुरू केले होते. ती तिच्या कुटुंबासाठी आशेचा नवा किरण होती. काही काळापूर्वी मलाही एका फॅक्टरीत नोकरी मिळाली होती. आम्हाला भविष्य सुधारेल असं वाटत होते तेव्हाच ही घटना घडली. नेहाला पाचव्या मजल्यावरून खाली ढकलणाऱ्या व्यक्तीचे नाव तौफीक आहे. जो बुरखा घालून आमच्या इमारतीत शिरला होता असं वडिलांनी म्हटलं.
मी खाली काम करत होतो, तेव्हा अचानक मोठा आवाज ऐकला. वरच्या बाजूला पाहिले तर तौफिक माझ्या मुलीवर हल्ला करत होता. मी तिला वाचवण्याचा प्रयत्न केला परंतु तौफिकने मलाही दूर ढकलले. मी शेजारीच छतावर पडलो. त्यानंतर तौफीकने माझी मुलगी नेहाला धक्का दिला. त्यात ती पाचव्या मजल्यावरून खाली पडली असा आरोप नेहाच्या वडिलांनी केला आहे. नेहाला ढकलून पळून जाणाऱ्या तौफिकला पकडण्याचा शेजाऱ्यांनी प्रयत्न केला मात्र तो पळून गेला. नेहाने १२ वी पास केली होती. तिला कुटुंबाला आधार द्यायचा होता.
नेमकं काय होते?
नेहा आणि तौफीक काही वर्षापासून एकमेकांना ओळखायचे. तौफीकने एकदा म्हटले होते, त्याला कुणीही बहीण नाही. नेहा त्याला भाऊ मानायची. त्याच्या हातावर राखी बांधायची. तौफीक कुटुंबातील एक सदस्य म्हणून जवळ आला. त्यानंतर तौफीकला एक बहीण असल्याचे समोर आले. हे समजताच नेहाने तौफीकसोबत बोलणे बंद केले. त्यानंतर तौफीकने तिला त्रास देणे सुरू केले. तौफीक वारंवार नेहाच्या ऑफिसमध्ये फोन करायचा. नेहाने त्याला मला कॉल करू नको असं बजावले होते. अलीकडेच तौफीकने नेहावर लग्नासाठी दबाव टाकला. जर तू माझी झाली नाहीस तर तुला सोडणार नाही अशी धमकीही तौफीकने नेहाला दिल्याचे आईने म्हटले.