नाशिक : पत्नीच्या चारित्र्यावर संशय घेत मागील काही दिवसांपासून दाम्पत्यामध्ये होणाऱ्या वादाचे पर्यावसन अखेर प्राणघातक हल्ल्यात मंगळवारी (दि.७) झाले. विवाहितेच्या गळ्यावर धारदार चाकूने वार करत पतीने गंभीर जखमी केले. रक्तबंबाळ झालेल्या पत्नीला बघून त्याने तिसऱ्या मजल्यावरील सदनिकेच्या बाल्कनीत धाव घेत खाली उडी घेऊन आत्महत्या केल्याची घटना मखमलाबाद शिवारात भरदुपारी घडली. गंभीररीत्या जखमी झालेल्या महिलेवर रुग्णालयात उपचार सुरू आहे.
मखमलाबाद शिवारातील रामकृष्णनगर (शांतीनगर) भागात लक्ष्मी रेसिडेन्सी नावाची अपार्टमेंट आहे. या अपार्टमेंटच्या तिसऱ्या मजल्यावर राजीव रतनसिंग ठाकूर (५०), संध्या राजू ठाकूर (४५) हे दाम्पत्य आपल्या तरुण मुला, मुलीसोबत वास्तव्यास आहेत. राजू ठाकूर हे एका खासगी वाहनावर चालक म्हणून नोकरी करतात. तसेच त्यांची मुलेही खासगी नोकरी करतात संध्या या गृहिणी असून, मागील काही दिवसांपासून या दाम्पत्यामध्ये वादविवाद सुरू होते. राजू ठाकूर हे चारित्र्याच्या संशयातून वारंवार विवाहितेसोबत वाद घालत होते. मंगळवारी दुपारी तीन वाजेच्या सुमारास घरात पती-पत्नी हे एकटेच होते. त्यांची मुले कामानिमित्त घराबाहेर गेलेली होती. यावेळी दोघांमध्ये जोरदार भांडण झाले. संशयित राजू याने पत्नीला शिवीगाळ करत वाद घातला आणि चाकूने गळ्यावर वार करत गंभीर जखमी केले. पत्नी रक्ताच्या थारोळ्यात पडल्यानंतर घाबरून संशयित राजू याने इमारतीच्या बाल्कनीतून खाली उडी मारून आत्महत्या केली. जखमी झालेल्या संध्या ठाकूर यांना रुग्णालयात दाखल करण्यात आले असून, त्यांच्यावर उपचार सुरू असून, प्रकृती चिंताजनक असल्याचे पोलिसांनी सांगितले. याप्रकरणी म्हसरूळ पोलीस ठाण्यात मयत संशयित राजूविरुद्ध प्राणघातक हल्ला व आत्महत्येचा गुन्हा दाखल करण्याचे काम रात्री उशिरापर्यंत सुरू होते.