सोनम कपूरच्या लग्नघरात लाखो रुपयांचा डल्ला

अभिनेत्री सोनम कपूरचा लग्न सोहळा वांद्रे येथील ‘रॉकडेल’ बंगल्यात पार पडला. गेल्या आठवड्यात याच लग्नघरात लाखोंची चोरी झाल्याचा प्रकार उघडकीस आला आहे.

मुंबई  - अभिनेत्री सोनम कपूरचा लग्न सोहळा वांद्रे येथील ‘रॉकडेल’ बंगल्यात पार पडला. गेल्या आठवड्यात याच लग्नघरात लाखोंची चोरी झाल्याचा प्रकार उघडकीस आला आहे. चोराच्या हालचाली बंगल्याच्या सीसीटीव्हीमध्ये कैद झाल्या असून वांद्रे पोलीस ठाण्यात गुन्हा दाखल करण्यात आला आहे.वांद्रे पश्चिमेकडील बी. जे. रोड, बँड स्टॅण्डवर अभिनेते अनिल कपूर यांची मेव्हणी आणि सोनमची मावशी कविता सिंग यांचा हा बंगला आहे. याच बंगल्यात सोनमचे लग्न आनंद आहुजा यांच्यासोबत पार पडले. पाच मजल्यांचा हा बंगला असून चौथ्या मजल्यावर सोनमची मावशी कुटुंबासह राहते. सोनमचा मावस भाऊ करण जसजीत सिंग (३९) आणि त्यांची पत्नी नामा हे रात्री १च्या सुमारास चौथ्या मजल्यावरील बेडरूममध्ये झोपले होते. नामा यांना पहाटे ७ वाजता जाग आली. तेव्हा बेडरूमच्या खिडक्यांचे स्लाईड उघडे होते. पैशांची पर्स खाली फेकली होती. बंगल्यातील सीसीटीव्ही फूटेज तपासले असता एक इसम बेडरूमच्या खिडकीतून बंगल्यात प्रवेश करताना दिसला. चोरी झाल्याचे समजताच वांद्रे पोलिसांत त्यांनी तक्रार केली. मोबाइल, रोकड मिळून २ लाख ७७ हजारांचा ऐवज चोरी झाल्याचा संशय आहे. याच बंगल्यात सोनमच्या लग्नात आलेल्या महागड्या भेटवस्तूही होत्या, असे सूत्रांचे म्हणणे आहे. यातील काही चोरीला गेल्याचा संशय आहे. या चोराचा शोध वांद्रे पोलिसांसह गुन्हे अन्वेषण विभाग घेत आहे.