नवी दिल्ली – बंगाली सिनेसृष्टीत आणखी एक खळबळ उडवणारी घटना समोर आली आहे. कोलकाता येथे आणखी एका मॉडेलनं आत्महत्या करत जीवनयात्रा संपवली आहे. मंजूषा नियोगीचा मृतदेह तिच्या राहत्या घरी गळफास घेतलेल्या अवस्थेत आढळला आहे. अद्याप मंजूषाच्या मृत्यूचं कारण समजू शकलं नाही. पोलीस सध्या या प्रकरणाचा तपास करत आहेत. बंगाली सिनेसृष्टीत काय चाललंय असा प्रश्न आता उभा राहू लागला आहे.
मागील ३ दिवसांत दुसऱ्या अभिनेत्रीचा मृत्यू झाला आहे. विशेष म्हणजे गेल्या १५ दिवसांत कोलकाता येथे ३ अभिनेत्रींचा मृत्यू झाला आहे. या घटनांनी बंगाली सिनेसृष्टी हादरली आहे. सुरुवातीला छोट्या पडद्यावरील अभिनेत्री पल्लवी डे हिचा मृत्यू झाला होता. १५ मे रोजी पल्लवीचा मृतदेह राहत्या घरी गळफास घेतलेला आढळला. पल्लवीच्या कुटुंबाने याबाबत हत्येचा गुन्हा पोलीस ठाण्यात नोंदवला. त्यामुळे पल्लवीसोबत लिव्ह इन रिलेशनशिपमध्ये राहणाऱ्या बॉयफ्रेंडला पोलिसांनी अटक केली.
अभिनेत्री विदिशाच्या मृत्यूचा तपास सुरू
पल्लवीच्या मृत्यूनंतर २ दिवसांनी उत्तर कोलकाता येथे मॉडेल अभिनेत्री विदिशा डे मजुमदार हिचा मृतदेह पंख्याला लटकलेल्या अवस्थेत आढळला. विदिशानं एक सुसाइड नोटही लिहिली होती. माझ्या मृत्यूसाठी कुणाला जबाबदार धरू नका असं त्यात म्हटलं होते. पोलिसांनी विदिशाच्या मृत्यूबाबत गुन्हा नोंदवत तपासाला सुरुवात केली आहे. अभिनेत्रीचे तिच्या बॉयफ्रेंडशी संबंधांबाबत चौकशी सुरू आहे. बॉयफ्रेंडमुळे ती मानसिक तणावाखाली होती असं तिचे मित्र म्हणतात. विदिशाने तिच्या सुसाइड नोटमध्ये तिला कॅन्सर असल्याचं म्हटलं परंतु तो नव्हता असं चौकशीतून समोर आले.
विशेष म्हणजे या दोन्ही तपासात एक साम्य म्हणजे मंजूषा नियोगी आणि विदिशा दोघीही चांगल्या मैत्रिणी होत्या. मंजूषाच्या आईनं सांगितले की, विदिशाच्या मृत्यूनंतर मंजूषा मानसिक तणावाखाली होती. मंजूषाचा मृतदेह पोलिसांनी पोस्टमोर्टमसाठी पाठवला आहे. मंजूषा आणि विदिशा या दोघींच्या मृत्यूमध्ये काही कनेक्शन आहे का? या दोघींच्या मृत्यूमागं कुठलं रहस्य दडलं आहे? या सर्व प्रश्नांची उत्तरं शोधण्यासाठी पोलीस संबंधित तपास बारकाईने करत आहे.