नरेश रहिले, गोंदिया: एक दिवसापूर्वी दहा हजार रुपये मोठ्या भावाने लहान भावाला मागितले; परंतु त्याने आज पैसे नाहीत उद्या देईल म्हणणाऱ्या लहान भावाला यमसदनी पाठविण्यासाठी मद्यपी असलेल्या मोठ्या भावाने लोखंडी सळईने झोपेतच असलेल्या लहान भावाच्या डोक्यावर मारून गंभीर जखमी केले. ही घटना १९ नोव्हेंबर रोजी सकाळी ६ वाजता चांदोरी खुर्द येथे घडली.
तिरोडा तालुक्यातील चांदोरी खुर्द येथील मोरगेंद्र रतिराम बिसेन (२३) हा तरुण १८ नोव्हेंबर रोजी काका राजेश्वर बिसेन यांच्या घरी पाहुणे आल्यामुळे मोरगेंद्र रतिराम बिसेन (२३) हा काकाकडे गेला होता; परंतु मद्याच्या धुंदीत असलेला त्याचा मोठा भाऊ धर्मराज बिसेन हा त्या ठिकाणी आला. लहान भावाला १० हजार रुपये आताच दे असा आग्रह केला; परंतु माझ्याकडे आता पैसे नाहीत, मी उद्या देईन असे म्हटल्यावर आरोपीने त्याला मारण्याची धमकी देत तो निघून गेला. मोरगेंद्र हा काका घरीच झोपला. दुसऱ्या दिवशी १९ नोव्हेंबर रोजी सकाळी ६ वाजता सगळे लोक झोपेत असताना आरोपी धर्मराज बिसेन हा लोखंडी सळई घेऊन त्या ठिकाणी आला. मोरगेंद्र यांच्या डोक्यावर लोखंडी सळईने वार करून त्याला गंभीर जखमी केले. यावर मोरगेंद्र जोराने ओरडले असता मनीष राजेश्वर बिसेन, रजनी राजेश्वर बिसेन, यशोदा राजाराम बिसेन यांना तत्काळ मोरगेंद्रच्या दिशेने धाव घेतली. आरोपी धर्मराज बिसेनला थांबविले. या घटनेसंदर्भात तिरोडा पोलिसांनी भादंविच्या कलम ३२४, ५०४, ५०६ अन्वये गुन्हा दाखल केला आहे. तपास पोलिस हवालदार बिल्लोरे करीत आहेत.