पारधी समाजातील एका महिलेला आपण चारित्र्य संपन्न असल्याचे सिद्ध करण्यासाठी अनोखी परिसखा द्यावी लागली. तिने उकळत्या तेलात हात घातला होता. जात पंचायतीच्या या अमानुष न्यायनिवाड्याचा छळाचा प्रकार उस्मानाबाद जिल्ह्यातील परंडा तालुक्यात घडला आहे. मात्र आता या प्रकराला एक गंभीर वळण लागलं आहे. पीडित महिलेवर गावातील एका व्यक्तीसह पोलीस कर्मचाऱ्यानं लैंगिक अत्याचार केल्याचा आरोप पीडिता आणि तिच्या पतीने केला आहे.
पीडित महिला आणि तिचा पती आता मीडियासमोर आले आहेत. गावातील एक व्यक्ती आणि परंडा पोलीस विभागातील एका कर्मचाऱ्याने संबंधित महिलेवर लैंगिक अत्याचार केल्याचा आरोप करण्यात आला आहे. नवऱ्याला तुरुंगात डामण्याची धमकी देऊन तिच्यावर अत्याचार केल्याचा आरोप करण्यात आला असून कारवाई करण्याची मागणी करण्यात आली आहे, अशी माहिती टीव्ही ९ने दिली आहे.
सध्या सोशल मीडियावर एक व्हिडीओ खूप व्हायरल होत आहे. पारधी समाजातील एका व्यक्तीने आपल्या पत्नीवर चारित्र्याचा संशय घेतला. अशावेळी या समाजातील जायपंचायतीने महिलेला एक परीक्षा द्यायला सांगितली. संबंधित महिलेच्या पतीनं दगडांची चूल मांडली. चुलीत आग लावून कढई ठेवली आणि कढईत तेल ओतलं. ते उकळल्यावर नवऱ्याने त्या कढईत ५ रुपयांचं नाणं टाकलं आणि उकळत्या तेलात हात घालून ते नाणं काढण्यास महिलेला सांगण्यात आलं.
या अमानुष परीक्षेचा परिणाम त्या महिलेला माहिती होता. ती तेलात हात घालण्यास नकार देत होती. पण आपल्या पत्नीचं चारित्र्य तपासण्यासाठी तिच्या पतीनं तेलात हात घालण्यासाठी जोरजबदस्ती केली. उकळत्या तेलातील नाणं बाहेर काढताना महिलेचा हात भाजला नाही तर तिचं चारित्र्य शुद्ध! जर तिचा हात भाजला तर तिला चारित्र्यहीन असल्याचं जाहीर केलं जातं. या प्रकाराचा व्हिडीओ सोशल मीडियावर व्हायरल होत आहे. अशी अमानवी शिक्षा देणाऱ्यांवर जात पंचायत विरोधी कायद्याअंतर्गत गुन्हा दाखल करावा आणि आरोपींना कठोर शिक्षा द्यावी अशी मागणी अनेक सामाजिक संघटनांनी केली आहे. मात्र, आता या प्रकाराला गंभीर वळण लागल्याने उस्मानाबाद पोलीस या प्रकरणात काय कारवाई करतात, याकडे लक्ष आहे.