भीलवाडा – राजस्थानच्या भीलवाडा येथे एका व्यक्तीने स्वत:च्या पत्नीच्या दुसऱ्या लग्नामुळे इतका संतापला की त्याने मुलीसमोर चाकू भोसकून तिची हत्या केली. भीमगंजच्या टिळकनगर भागात तो राहतो. २४ वर्षीय ज्योती व्यासला आरोपी नीरज भारतीयने जीवे मारले आहे. ज्योतीनं नीरजसोबत घटस्फोट घेतला होता. त्यानंतर तिने दुसरं लग्न केले. ही गोष्ट पहिल्या पतीला आवडली नाही म्हणून त्याने रागाच्या भरात तिचा जीव घेतला.
पोलिसांनी दिलेल्या माहितीनुसार, एका व्यक्तीने महिलेचा खून केल्याची माहिती मिळाल्यानंतर पोलिसांचं पथक घटनास्थळी पोहचली. जखमी महिलेला रुग्णालयात नेले परंतु उपचारादरम्यान तिचा मृत्यू झाला. हत्या करून आरोपी पती तिथून फरार झाला. पोलीस सध्या आरोपीचा शोध घेत आहेत. ज्योती व्यास टिळकनगर भागात एकटी राहत होती. आरोपीने घरात घुसून चाकूने हत्या केल्याचं प्रत्यक्षदर्शीनी सांगितले. परंतु घरात काय झालं याबाबत कुणालाही माहिती नाही.
चाकूने लागल्यानंतर महिला ओरडत घराबाहेर पडली. १०० मीटर धावली आणि बेशुद्ध पडली. ती पुर्णपणे रक्ताच्या थारोळ्यात पडली होती. ती जखमी अवस्थेत असताना तिचा पती शेजारी बसला. परंतु कुणालाही जवळ जाण्याची हिंमत झाली नाही. त्यावेळी कुणीतरी पोलिसांना फोन करून घटनेची माहिती दिली. त्यानंतर तात्काळ पोलीस पथक घटनास्थळी पोहचले. जेव्हा पोलीस पोहचले तेव्हा आरोपी पतीने घटनास्थळावरून पळ काढला.
मिळालेल्या माहितीनुसार, ज्योतीचा मुलगा आणि मुलगीही घरी होते. मुलगी तिच्या आईसोबत राहते. तर मुलगा वडिलांसोबत राहतो. ज्योती शिवणकाम करत घर सांभाळत होती. तर आरोपी नीरज आसिंदला राहणारा होता. पोलिसांनी ९ वर्षीय मुलगी हर्षिताला चौकशीसाठी बोलावलं तेव्हा तिने सांगितले की, पप्पा घरी आले आणि आईशी भांडू लागले. त्यानंतर त्यांनी बॅगेतून चाकू काढला आणि आईला मारू लागले. घाबरलेल्या अवस्थेत आई घराबाहेर गेली. तर ज्योतीने अलीकडेच नीरजशी घटस्फोट घेत दुसरं लग्न केले होते. २० मे रोजी रिसेप्शन होतं. त्याआधीच तिची हत्या केली.