रशियन मॉडेल ग्रेटा वेडलरचा (Russian Model Gretta Vedler) मृतदेह एका सुटकेसमध्ये सापडला आहे. 23 वर्षीय ग्रेटा जवळपास एक वर्षापासून बेपत्ता होती, मात्र तिचे सोशल मीडिया अकाउंट सुरू होते. ग्रेटाने रशियाचे अध्यक्ष व्लादिमीर पुतिन (Vladimir Putin) यांना मनोरुग्ण म्हटले होते, तेव्हा ती पहिल्यांदा चर्चेत आली होती.
फॉक्स न्यूजच्या रिपोर्टनुसार, मॉडेल ग्रेटा वेडलरची हत्या तिचा एक्स बॉयफ्रेंड दिमित्री कोरोविनने (Dimitry Korovin) केली. कोरोविनने ग्रेटाचा गळा दाबून खून केला आणि नंतर मृतदेह एका सुटकेसमध्ये भरून कारच्या डिक्कीमध्ये टाकला होता. या घटनेनंतर आता कोरोविनने त्याच्या गुन्ह्याची कबुली दिली आहे. ग्रेटा वेडलरला 300 मैल दूर रशियाच्या लिपेटस्क येथे नेले होते, जिथे त्याने ग्रेटाचा मृतदेह एका सुटकेसमध्ये ठेवून कारच्या डिक्कीमध्ये मृतदेह फेकला, असे कोरोविनने म्हटले आहे.
पैशाच्या वादातून दिमित्री कोरोविनने ग्रेटाची हत्या केल्याचे सांगण्यात आले. तसेच, या हत्येचा आणि ग्रेटाच्या राजकीय विधानाचा काहीही संबंध नसल्याचे म्हटले जात आहे. कोरोविनने तपास अधिकाऱ्यांना सांगितले की, तो तीन रात्री हॉटेलच्या खोलीत ग्रेटाच्या मृतदेहासोबत झोपला होता. ग्रेटाच्या मृत्यूनंतर, कोरोविनने तिचे सोशल मीडिया पेज अपडेट करत होता, जेणेकरुन कोणालाही तिच्या मृत्यूचा किंवा गायब झाल्याचा संशय येऊ नये, असेही तपास अधिकारी म्हणाले.
दरम्यान, रशिया आणि युक्रेन यांच्यात सुरू असलेल्या युद्धाच्या (Russia Ukraine War) दरम्यान रशियन मॉडेल (Russian Model) ग्रेटाचा मृतदेह सापडल्याने अनेक प्रश्न निर्माण झाले आहेत. खरंतर, रशियन मॉडेल ग्रेटाने वर्षभरापूर्वी राष्ट्राध्यक्ष पुतिन यांच्यावर उघडपणे टीका केली होती. त्यानंतर ती बेपत्ता होती. मात्र, आता तिचा मृतदेह सापडला असून मारेकऱ्यानेही आपला गुन्हा मान्य केला आहे.