मुंबईतील साकीनाका परिसरातील बलात्काराची घटना ताजी असताना उत्तर प्रदेशमध्ये देखील एका राष्ट्रीय स्तरावरील खोखो खेळाडूवर बलात्काराची घटना घडली आहे. बिजनौर रेल्वे स्थानकावजळ रेल्वे ट्रॅकवर तिचा मृतदेह सापडल्याने खळबळ उडाली आहे. पोलिसांनी बलात्कार आणि हत्येचा गुन्हा नोंद केला असून तपास सुरु केला आहे. (Rape on National Kho Kho player in Bijnor, murder.)
बिजनौरची ही 24 वर्षीय खेळाडू शुक्रवारी दुपारी आपल्या घरातू एका कॉलेजमध्ये इंटरव्ह्यूसाठी निघाली होती. मात्र, रात्री उशिरापर्यंत घरी पोहोचली नसल्याने घरच्यांनी शोधाशोध सुरु केली. तेवढ्यात एका शेजारच्या महिलेने रेल्वे ट्रॅकवर एक रक्ताच्या थारोळ्यात तरुणीचा मृतदेह पडलेला सापडल्याचे सांगितले. यामुळे घरच्यांनी पोलिसांना खबर दिली. काही तासांनी तिची ओळख पटली.
तिच्या घऱच्यांना समजण्याआधीच पोलीस तिथे पोहोचले होते. घरापासून काही अंतरावर असलेल्या रेल्वे स्टेशनच्या गोदामाच्या मागे तिचा मृतदेह सापडला होता. पोलिसांनी मुलीची ओळख पटविण्याचा प्रयत्न केला होता. तिच्या शरीरावरील घाव पाहून असे दिसते की तिच्यावर बळजबरी करण्यात आली. तिच्या गळ्यात ओढणी आवळलेली होती. तिची गळा दाबून हत्या करण्यात आल्याचे दिसून येते. तिच्या शरीरावर जखमादेखील होत्या. तिचा एक दातही तुटला आहे. नाकातून रक्त येत होते, असे तिच्या बहीणीने सांगितले.
मृत खेळाडू ही २०१६ मध्ये महाराष्ट्रात झालेल्या खो-खो स्पर्धेत खेळली होती. तसेच युनिव्हर्सिटीमध्ये देखील तीने स्पर्धांमध्ये भाग घेतला होता. धक्कादायक बाब म्हणजे गुन्हा कोणी नोंदवायचा यावरून रेल्वे पोलीस आणि राज्याचे पोलीस यांच्यात वाद होत होता. अखेर राज्याच्या पोलिसांनी गुन्हा दाखल करून घेतला आहे. रेल्वे स्टेशन भागातील नशेबाज लोकांवर पोलिसांनी संशय व्यक्त केला आहे.