जयपूर: राजस्थानच्या सवाई माधोपूर जिल्ह्यात खंडार पोलीस ठाण्याच्या हद्दीत एक धक्कादायक घटना घडली आहे. एका मुलानं डोक्यात काठी घालून वडिलांची हत्या केली आहे. वडिलांचा मृतदेह शवविच्छेदनानंतर कुटुंबीयांच्या ताब्यात देण्यात आला. वडिलांच्या हत्या करणाऱ्या मुलाला पोलिसांनी अटक केली आहे. पोलीस चौकशीत मुलानं हत्येची कबुली दिली.
वडिलांची हत्या करण्यामागचं कारण पोलिसांनी चौकशी दरम्यान मुलाला विचारलं. त्यावर अब्बा त्रासले होते. त्यामुळे त्यांना जन्नतमध्ये पाठवलं, असं उत्तर आरोपी मुलानं दिलं. सध्या पोलीस आरोपीची अधिक चौकशी करत आहेत. हत्या झालेल्या व्यक्तीचं नाव इब्राहिम खान असून आरोपी मुलाचं नाव कुतुबुद्दीन आहे.
शुक्रवारी दुपारी २.३० वाजता इब्राहिम घरात झोपले होते. त्यांचा मोठा मुलगा अमीमुद्दीन कामासाठी बाहेर गेला होता. तर लहान मुलगा कुतुबुद्दीन घरीच होता. त्यानं झोपलेल्या इब्राहिम यांच्यावर काठीनं हल्ला केला. त्यानंतर इब्राहिम यांच्या डोक्यातून रक्तस्राव होऊ लागला. वेदनेनं विव्हळत असलेले इब्राहिम थोड्याच वेळात बेशुद्ध पडले. इब्राहिम यांचा आवाज ऐकून शेजाऱ्यांनी धाव घेतली. त्यावेळी कुतुबुद्दीन वडिलांच्या बाजूला बसून होता.
वडिलांना का मारलं असा प्रश्न शेजाऱ्यांनी विचारला. त्यावर वडील अस्वस्थ होते. त्यामुळे त्यांना जन्नतमध्ये पाठवल्याचं कुतुबुद्दीननं सांगितलं. शेजाऱ्यांनी घटनेची माहिती अमीनुद्दीनला दिली. त्यानंतर रक्ताच्या थारोळ्यात पडलेल्या इब्राहिम यांना माधोपूर सामान्य रुग्णालयात नेण्यात आलं. मात्र त्यांची प्रकृती गंभीर असल्यानं त्यांना जयपूरला रेफर करण्यात आलं. रुग्णालयात नेत असताना त्यांनी प्राण सोडला. त्यानंतर पोलिसांनी कुतुबुद्दीनला अटक केली.