बार्शी शहरातील तेलगिरणी चौकामध्ये दोन परराज्यातील अल्पवयीन मुली ठेवून कुंटणखाना चालविला जातो अशी माहिती पुणे येथील सामाजिक संस्थेला समजताचं जिल्हा पोलीस अधीक्षक पथक, उपअधिक्षक, बार्शी शहर पोलीस पथक यांनी छापा टाकताच दोन अल्पवयीन मुली आढळून आलेल्या आहेत. कुंटणखाना चालविणाऱ्या महिलेवर गुन्हा दाखल करून अटक करण्यात आली आहे.
पुणे येथील सामाजिक संस्थेला शहरातील तेलगिरणी चौकात दोन परराज्यातील मुलींकडून जबरदस्तीने वेश्या व्यवसाय कुंटणखाना चालवला जात आहे, अशी माहिती मिळाली होती. संस्थेने पोलीस अधीक्षक कार्यालयाशी संपर्क साधला होता. त्यानुसार पोलिसांनी पंचांसमवेत छापा टाकला.
बनावट ग्राहक तयार करून कुंटणखान्यामध्ये पाठवण्यात आले. त्यांच्याजवळ देण्यात आलेली रक्कम तसेच रोख १७ हजार २०० रुपये रक्कम, दोन मोबाईल, इतर साहित्य असा एकूण ३० हजार रुपयांचा मुद्देमाल जप्त करण्यात आला आहे. दोन अल्पवयीन मुलींची सुटका करण्यात आली असून तेथील आवारात मिळालेल्या सहा इतर महिलांना पोलिसांनी ताब्यात घेतले आहे.