मुंबई : विलेपार्लेच्या हॉटेल बावा इंटरनॅशनलमध्ये तोतया पोलीस बनून १२ कोटींचा गंडा घातल्याप्रकरणी विलेपार्ले पोलिसांनी आणखी दोघांना अटक केली. मात्र त्या १२ काेटींचा मालक अजून पडद्याआड असून अद्याप त्यांच्याबाबत कोणतीही माहिती पोलिसांकडून उघड केलेली नाही.
विलेपार्ले पोलिसांनी कार्तिक ऊर्फ लक्ष्मणला ताब्यात घेतले आहे, जो या प्रकरणात टिपर असल्याची माहिती आहे. तर आसिफ सय्यद असे ताब्यात घेतलेल्या दुसऱ्या आरोपीचे नाव आहे. साेमवारी या दोघांना २५ फेब्रुवारीपर्यंत पोलीस कोठडी सुनावण्यात आली. आसिफ १७ फेब्रुवारीला हॉटेल बावा इंटरनॅशनलमधून पैशांची बॅग घेऊन पसार झाल्याचा आरोप त्याच्यावर असून त्याने आत्मसमर्पण केल्याचे त्याचे वकील टी. ए. ठाकूर यांनी ‘लोकमत’ला सांगितले. पोलिसांनी याप्रकरणी शनिवारी नऊ जणांना अटक केली. ज्यात प्रेमचंद जयस्वाल हा तोतया पोलीस बनल्याची माहिती आहे. तिघांच्या अटकेबाबत विलेपार्ले पोलीस ठाण्याच्या वरिष्ठ अधिकाऱ्याशी संपर्क साधला असता त्यांनी काहीही माहिती दिली नाही.
अटक आरिफ आणि आसिफ सय्यद या दोघा भावांचे वकील ठाकूर यांच्या म्हणण्यानुसार १८ फेब्रुवारीला विलेपार्ले पोलिसांनी आरिफला अंधेरीच्या नामांकित हॉटेलमधून ताब्यात घेतले. मात्र दोन दिवसांनंतर म्हणजे १९ फेब्रुवारी, २०२१ रोजी रात्री सव्वाआठच्या सुमारास त्याला अटक दाखवली. पण १७ फेब्रुवारी रोजी हा प्रकार घडला तेव्हा तो मुंबईतच नव्हता. तर आसिफने आत्मसमर्पण केले.