कर्नाटकमध्ये एका भीषण रस्ते अपघातात 8 लोकांचा मृत्यू झाला आहे. चिंतामणी भागातील मरनायकनहळ्ळी हा अपघात झाला. जीप आणि लॉरीमध्ये टक्कर झाल्याने जीपमधील 8 जणांना जीव गमवावा लागला. चिक्कबळ्ळापूर पोलिसांनी याची माहिती दिली. (8 die, 7 injured in Karnataka road accident)
सात जण जखमी झाले आहेत. जीपमध्ये प्रमाणापेक्षा जास्त प्रवासी बसले होते. 2 मुलांसह 17 जण या जीपमधून प्रवास करत होते. हे सारे श्रीनिवासपुरा तालुक्याच्या रालपाडु येथून चिंतामणीला जात होते.
रविवारी हा अपघात झाला. जीपमधून काही लोक हायवेवरून जात होते. तेव्हा विरुद्ध दिशेने येणाऱ्या लॉरीला जोरदार धडक बसली. यामध्ये 8 जणांचा जागीच मृत्यू झाला. मृतदेह शवविच्छेदनासाठी पाठविण्यात आले आहेत. चिंतामणीचे आमदार जे.के. कृष्णा रेड्डी यांनी घटनास्थळी भेट दिली.
कर्नाटकमध्ये याआधीही अनेकदा असे भीषण अपघात झाले आहेत. गोव्याच्या महिला मंडळाची पर्यटनाला निघालेल्या मिनीबसचा अपघात या वर्षाच्या सुरुवातीला जानेवारीला झाला होता. यामध्ये 11 महिलांचा मृत्यू झाला होता.