नागपूर : बारावीतील एका विद्यार्थिनीने स्नॅप चॅटवर एका तरुणाशी मैत्री केली. त्याची पुरेशी माहिती नसताना त्यांची मैत्री झाली अन् ऑनलाइन प्रेमही बहरले. ते एवढे पुढे गेले की, तिने त्याला आपले न्यूड व्हिडिओ पाठवले, मात्र नंतर सुरू झाले ब्लॅकमेलिंग.
संबंधित प्रकरणातील तक्रारदार युवती १७ वर्षांची आहे. ती मानकापूरमध्ये राहते. रितिक मिश्रा नावाच्या आरोपीसोबत तिची गेल्या वर्षी स्नॅप चॅटवर ओळख झाली होती. दोघांचे ऑनलाइन प्रेम प्रकरण बहरले. ते सलग एकमेकांच्या संपर्कात राहू लागले. तिने त्याला न्यूड फोटो आणि व्हिडिओ पाठवले. त्यानंतर त्याची मागणी वाढतच गेली. त्यामुळे युवतीने त्याला टाळणे सुरू केले. रितिक ब्लॅकमेलिंगवर उतरला. ते पाहून तिने त्याच्याशी बोलणे बंद केले, त्याला ब्लॉक केले.
मात्र रितिकने तिच्या मोबाइलमधील संपर्कात असलेले सर्व नंबर काढून त्यातील एका जवळच्या व्यक्तीला तिचे आक्षेपार्ह व्हिडिओ पाठवले. त्याला फोन करून तिला बोलायला सांग, नाही तर गंभीर परिणाम होतील, अशी धमकी दिली. नातेवाइकाने हा व्हिडिओ तिला दाखवून विचारणा केली. तिच्या आई- वडिलांनाही हा प्रकार सांगितला. त्यानंतर पीडित युवतीने मानकापूर पोलीस ठाण्यात शनिवारी तक्रार नोंदवली. ठाणेदार वैजयंती मांडवधरे यांनी रितिकविरुद्ध विनयभंगाचा गुन्हा दाखल केला आहे.