नोएडा - ज्या आईचं दुध पिऊन मुलगा मोठा झाला तिलाच मारताना निर्दयी मुलाचे हात धजावले नाहीत. ती आई प्रत्येकक्षणी मुलाची काळजी करत होती. बायकोचं आईसोबत भांडणं झाल्यानंतर मुलाने आईलाचा वाटेतून बाजूला सारायचं ठरवलं. ही खळबळजनक घटना उत्तर प्रदेशातील ग्रेटर नोएडा येथील आहे. कलियुगी मुलाने स्वत:च्या आईवर लाठीकाठीनं धारदार शस्त्रानं हल्ला केला आहे. मुलाच्या हल्ल्यात आई गंभीररित्या जखमी झाली. पोलिसांनी आरोपी मुलाला अटक केली आहे.
या भयानक हल्ल्याचं दृश्य पाहून प्रत्येकाचं काळीज फाटलं. बघणाऱ्याच्या डोळ्यातही पाणी आलं. आसपास राहणारे लोकही संतापले. व्हिडीओ व्हायरल झाल्यानंतर पाहणारा सुन्न झाला. सध्या या वृद्ध आईची तब्येत स्थिर असून तिच्यावर उपचार सुरू आहेत. वृद्ध महिलेचे नातेवाईक आणि पोलीस हॉस्पिटलमध्ये हजर आहेत. पोलीस उपायुक्त हरिश चंदर म्हणाले की, मोहियापूर गावात राहणाऱ्या श्रीमती जगमती यांच्या मुलाने २८ मे रोजी रात्री दारूच्या नशेत आईवर लाठीकाठी, शस्त्राने हल्ला केला.
तसेच या घटनेची माहिती मिळताच पोलीस तात्काळ घटनास्थळी पोहचले त्यांनी आरोपी मुलाला अटक केली. तपासावेळी पोलिसांना कळालं की, आरोपी मनोजची पत्नी आणि त्याच्या आईमध्ये भांडण झाले होते. त्यानंतर पत्नी रागात माहेरी निघून गेली. मनोजच्या पत्नीने पतीसमोर अट ठेवली की जोपर्यंत सासू घरातून जात नाही तोवर ती सासरी येणार नाही. पत्नीच्या या अटीमुळे आरोपी मनोजनं आईचा काटा काढण्याचं ठरवलं.
आरोपी मनोज रागाच्या भरात घरी पोहचला त्याने दारूच्या नशेत आईवर जीवघेणा हल्ला केला. परंतु ती थोडक्याच बचावली. पोलिसांनी हे प्रकरण गांभीर्याने घेतले आहे. एका वरिष्ठ अधिकाऱ्यांनी या घटनेचा आढावा घेतला. सोशल मीडियावर वृद्ध महिलेच्या मारहाणीचा व्हिडीओ व्हायरल होत आहे. लोकांनी या कलियुगी मुलाविरोधात संताप व्यक्त केला आहे. या मुलाला कठोर शिक्षा द्यावी अशी मागणी नेटिझन्सनं केली आहे. पोलिसांनी आरोपी मुलाविरोधात गुन्हा नोंदवून त्याला अटक केली आहे मात्र या प्रकाराने सर्वत्र संताप व्यक्त केला जात आहे.