अझहर शेख/संदीप झिरवाळ, पंचवटी: फुलेनगर परिसरातील म्हाडा इमारतीच्या मागे असलेल्या सुलभ शौचालयजवळ मित्रांसोबत गप्पा मारणाऱ्या गुन्हेगारी पार्श्वभूमी असलेल्या युवकावर चौघा संशयित आरोपींनी पोटावर, मानेवर धारदार शस्त्राने वार करून खून केल्याची घटना सोमवारी (दि.25) मध्यरात्री दोन वाजेच्या सुमाराला घडली. या घटनेत दिंडोरी रोडवरील कालिका नगर मायको दवाखान्या मागे राहणारा निलेश श्रीपद उपाडे (21) याचा मृत्यू झाला. या खून प्रकरणी पंचवटी पोलिसांनी दोघा संशयितांना ताब्यात घेतले आहे.
सोमवारी मध्यरात्रीच्या सुमाराला मयत निलेश हा त्याचा मित्र उमेश साबळे याच्या समवेत गप्पा मारत असतांना संशयित आरोपी विश्वास बाबर, यश बाबर, रोहित गायकवाड, निलेश सावंत, नरेश बाबर, अमित सावंत त्याठिकाणी आले व त्यांनी पूर्ववैमनस्यातून झालेल्या वादातून कुरापत काढून निलेश याच्या पोटावर, मानेवर तसेच पाठीवर काहीतरी धारदार शस्त्राने वार केले या घटनेत निलेश गंभीर जखमी झाल्याने रक्ताच्या थारोळ्यात पडला होता त्याला जखमी अवस्थेत रुग्णालयात दाखल केले असता तेथे उपचार सुरू असतांना त्याचा मृत्यू झाला. घटनेचे वृत्त समजताच वरिष्ठ पोलिस निरीक्षक मधुकर कड यांच्यासह पोलिस पथकाने घटनास्थळी धाव घेतली होती. याबाबत मयत निलेश याचा भाऊ रोहित श्रीपत उपाडे याने दिलेल्या तक्रारी वरून पंचवटी पोलिस ठाण्यात दंगल तसेच खून केल्याचा गुन्हा दाखल करण्यात आला आहे.