ग्वालियर – शहरातील एक युवती लव जिहादला बळी पडली आहे. ग्वालियारच्या एका मुलीपासून धर्म लपवून काश्मीरमधल्या मुस्लीम तरुणाने लग्न केले. जेव्हा ही युवती तिच्या पतीसमवेत घरी पोहोचली तेव्हा वास्तव उघडकीस आले. यानंतर या युवतीने सोशल मीडियावर एक व्हिडिओ प्रसिद्ध करून आपली व्यथा सांगितली. ज्यामध्ये तिने तिच्या पतीवर जबरदस्तीने धर्मांतर करून तिच्यावर अत्याचार केल्याचा आरोप केला आहे. मुलगी सामाजिक संस्थांच्या मदतीने ग्वालियारला परतली आहे.
सध्या या मुलीचा व्हिडीओ सोशल मीडियावर मोठ्या प्रमाणात व्हायरल होत आहे. व्हायरल व्हिडिओमध्ये मुलगी म्हणते, ती ग्वालियारच्या समाधिया कॉलनीत राहत आहे. ती लव्ह जिहादला बळी पडली आहे असं तिचं म्हणणं आहे. त्यामुळे तिला न्याय मिळावा म्हणून तिची व्यथा जगासमोर सांगत आहे. ती युवती ग्वालियारची राहणारी असून एका इव्हेंट कंपनीत काम करते. ६ महिन्यांपूर्वी ती जयपूरला गेली होती, जिथे तिची भेट एका युवकाशी झाली. या युवकाने स्वत: ला काश्मिरी हिंदू साहिल कुमार असं संबोधले. यानंतर दोघांची मैत्री झाली. त्यानंतर त्या तरूणाने त्या मुलीशी लग्न केले. लग्नाच्या वेळी त्याने आपला धर्म लपविला होता असा आरोप मुलीने केला.
काश्मीरमध्ये पोहोचल्यानंतर वास्तव उघडकीस
व्हिडिओत मुलीने सांगितले की, आरोपी युवकाचे नाव शौकत अली खान असून तो सुरनकोट (जम्मू) येथील रहिवासी आहे. हिंदू असल्याचा दावा करून त्याने तिच्याशी लग्न केले. जेव्हा ती त्याच्या घरी पोहचली तेव्हा तिला त्याचे खरे नाव माहिती पडले. यानंतर या मुलीने पुन्हा परत येण्याचा प्रयत्न केला असता तिच्या पतीने आणि सासरच्यांनी मारहाण केली. त्यानंतर, मुलीचे बळजबरीने धर्मांतर केले आणि निकाह लावला. यानंतर भांडणाची सुरुवात झाली. पती आणि इतर कुटुंबातील सदस्यांनी तिचा गळा कापण्याचा प्रयत्न केल्याचं सांगत तिने तिला झालेल्या मारहाणीचे निशाण दाखवले.
जेव्हा या मुलीचा व्हिडिओ व्हायरल झाला तेव्हा ग्वालियारमधील हिंदू संघटनांनी काश्मिरी हिंदू संघटनेला मदतीसाठी आवाहन केले. ज्यावर पूंछ येथील महिला संघटनेने या युवतीसोबत जाऊन सुरनकोट पोलिस ठाण्यात गुन्हा दाखल केला. पोलिसांनी गुन्हा दाखल करत एफआयआर नोंदवला. आरोपी शौकतसह ४ जणांना अटक केली आहे.