इंदूरच्या चंदन नगर पोलीस स्टेशन हद्दीतील नंदन नगरमध्ये वृद्ध आईला मारहाण केल्याचा व्हिडीओ सोशल मीडियावर मोठ्या प्रमाणात व्हायरल होत आहे. व्हिडिओमध्ये मुलगा आपल्याच आईसोबत गैरवर्तन करत असून तिला मारहाण करत आहे. तो आधी आईला कानाखाली मारतो, नंतर तिला हाताने ढकलून देतो. आई जवळ आल्यावर मुलगा तिच्या पोटात जोरात लाथ मारतो. हा व्हिडीओ व्हायरल झाल्यानंतर पोलिसांनी हे प्रकरण गांभीर्याने घेत वृद्ध आईला पोलीस ठाण्यात बोलावले, मात्र, मुलाच्या या कृत्यानंतरही वृद्ध आईने आपल्या मुलावर कायदेशीर कारवाई करण्यास नकार दिला.
चंदन नगर पोलीस स्टेशन परिसरातील नंदन नगरमध्ये ही घटना घडली आहे. सुरेश वर्माने आपल्या वृद्ध आईला बेदम मारहाण केली, या भांडणाचा व्हिडीओ सोशल मीडियावर मोठ्या प्रमाणात व्हायरल होत आहे. व्हिडिओमध्ये मुलगा आपल्याच आईसोबत गैरवर्तन करत असून तिला मारहाण करत आहे. व्हिडिओमध्ये स्पष्टपणे दिसत आहे की, हा तरुण आधी आपल्या आईला थप्पड मारतो आणि नंतर तिला हाताने ढकलून देतो. आई जवळ आल्यावर मुलगा तिच्या पोटात जोरात लाथ मारतो.
"आजीला मारू नका"
19 सेकंदाच्या या व्हिडिओमध्ये नात घरातून येते आणि आजीला मारू नका असं म्हणते आणि मग वडिलांचा हात हातात घेते. सुरेश मंगळवारी रात्री वस्तीतील महिलांशी गैरवर्तन करत होता, तेव्हा त्याच्या आईने असं करू नकोस असं सांगितल्याचं रहिवाशांचे म्हणणे आहे. याच दरम्यान, सुरेशने आईलाही बेदम मारहाण केली. हा व्हिडिओ शेजाऱ्यांनीच खूप व्हायरल केला आहे.
मुलावर कारवाई करण्यास आईचा नकार
चंदननगर पोलिसांनी या प्रकरणाची गंभीर दखल घेत वृद्ध आईला पोलीस ठाण्यात बोलावले, मात्र, मुलाच्या या कृत्यानंतरही वृद्ध आईने आपल्या मुलावर कायदेशीर कारवाई करण्यास नकार दिला. दुसरीकडे अशी तक्रार आल्यास कठोर कारवाई केली जाईल, असे पोलिसांचे म्हणणे आहे. एका हिंदी वेबसाईटने याबाबतचे वृत्त दिले आहे.