भिवंडी - २३ वर्षीय तरुणीने २४ वर्षीय शेजारी राहणाऱ्या तरुणास प्रेमसंबंधास नकार दिल्याच्या रागातून तरुणाने सुऱ्याने तरुणीची निर्घृण हत्या करून मोठ्या बहिणीला वाचवण्यासाठी गेलेल्या लहान बहिणीलाही सुऱ्याने वार करून गंभीर जखमी केल्याची खळबळजनक घटना सोमवारी शहरातील भादवड गावातील कानिफनाथ मंदिराजवळील कृष्णानगर मधील शत्रुघ्न तरे चाळीत घडली आहे.याप्रकरणी हत्या करणाऱ्या आरोपीच्या विरोधात शांतीनगर पोलिस ठाण्यात गुन्हा दाखल करण्यात आला असून घटनेनंतर आरोपी फरार झाला आहे.
नितु भान सिंग (२३) असे मयत झालेल्या दुर्दैवी तरुणीचे नाव आहे.तर राजू महेंद्र सिंग (२४) असे हत्या करणाऱ्या आरोपी तरुणाचे नाव आहे. पोलिसांनी दिलेल्या माहितीनुसार,आरोपी तरुण व मयत तरुणी मूळची उत्तर प्रदेशातील भदोई जिल्ह्यातील ग्राम नेवादा मधील असून सद्यस्थितीत कुटुंबासोबत येथील भादवड गावातील कृष्णानगर मधील भरत तरे यांच्या चाळीतील एका भाड्याच्या खोलीत राहत आहेत.याच ठिकाणी आरोपीही मयत तरुणीच्या शेजारी राहत होता.
आरोपी राजू याच्या प्रेमसंबंधास नितु हिने नकार दिला होता.याच रागातून सोमवारी राजूने नितु घरी एकटी असताना भाजी कापण्याच्या सुऱ्याने नितुच्या शरीरावर सपासप वार करून तिची निर्घृण हत्या केली. यावेळी नितुची लहान बहिण रितूने नितुला वाचवण्यासाठी मध्यस्थी करण्याचा प्रयत्न केला असता आरोपीने रीतुच्या बोटाजवळ सुऱ्याने वार करून तिलाही जखमी केले आहे. याप्रकरणी मयत नितुच्या वडिलांच्या फिर्यादीवरून आरोपी राजूच्या विरोधात शांतीनगर पोलिस ठाण्यात गुन्हा दाखल करण्यात आला आहे. तर पोलिसांची कुणकुण लागताच राजू घटना स्थळावरून फरार झाला असून पोलिस त्याचा सीसीटिव्हीच्या आधारे कसून शोध घेत आहेत.पुढील तपास पोलिस निरीक्षक (गुन्हे) अतुल अडुरकर करीत आहेत.