कोलकाता - पश्चिम बंगालच्या चंदीतला जंगलपारा गावात एक हैराण करणारा प्रकार उघडकीस आला आहे. याठिकाणी इंदूरच्या सोनम आणि मेरठच्या मुस्कानसारखीच पत्नीने पतीची हत्या केली आहे. प्रियकरासोबत राहण्यासाठी पत्नीने पतीला संपवले आहे. दीड महिन्यांनी हा खुलासा समोर आला तेव्हा पोलिसांनी दफन केलेला पतीचा मृतदेह बाहेर काढला. पत्नीने पतीची हत्या करून एका ७ फूट खोल खड्ड्यात त्याचा मृतदेह पुरून ठेवला होता.
रॉबिन रुइदास नावाचा व्यक्ती ४० दिवस बेपत्ता होता. पोलिसांच्या माहितीनुसार, रॉबिनचा मृतदेह त्याच्या सासरच्या घरापासून अर्धा किमी अंतरावर सापडला आहे. मुर्शिदाबाद जिल्ह्यातील जांगीपारा येथील गावात ट्यूबवेलजवळ हा मृतदेह दफन करण्यात आला होता. या प्रकरणाची चौकशी करताना पोलिसांनी रॉबिनच्या पत्नीला ताब्यात घेतले. वर्दीचा धाक दाखवताच तिने तिचा गुन्हा कबूल केला. त्यानंतर तिने सांगितलेल्या ठिकाणी पोलिसांनी खड्डा खणला तेव्हा त्यातून रॉबिनचा मृतदेह बाहेर काढला. या प्रकरणातील सर्व आरोपींना पोलिसांनी अटक केली आहे. बकरा बांधण्याच्या रस्सीने रॉबिनच्या पत्नीने पतीची गळा दाबून हत्या केली होती.
वहिनीने लावला अफेअरचा आरोप
रॉबिनची वहिनी शिखा रुइदास यांनी सांगितले की, अपर्णाचे अन्य कुणासोबत अफेअर सुरू होते. त्यावरून रॉबिनसोबत तिचे भांडण व्हायचे. मात्र मुलांकडे पाहून तो अपर्णाला सोडचिठ्ठी देत नव्हता. त्याचे अपर्णावर खूप प्रेम होते. एक दिवस सगळे ठीक होईल असं त्याला वाटायचे. तो अपर्णाच्या सर्व इच्छा पूर्ण करायचा परंतु ती आनंदी नसायची. अपर्णा माहेरी निघून गेली होती. रॉबिन सर्व काही विसरून तिला परत आणण्याचा प्रयत्न करत होता. तो तिला भेटायला सासरी गेला होता.
२ दिवसांनी घरच्यांनी दिली तक्रार
११ मे रोजी रॉबिन अपर्णाच्या आई वडिलांच्या घरी गेला होता. तिथे तो पत्नी आणि दोन्ही मुलांना भेटला. जेव्हा रात्री तो घरी परतला नाही तेव्हा घरच्यांना चिंता सतावू लागली. रॉबिन त्याच्या सासरीच थांबला असावा असा अंदाज कुटुंबाने बांधला. दुसऱ्या दिवशीही रात्री उशिरापर्यंत घरच्यांनी रॉबिनची वाट पाहिली परंतु तो घरी आला नाही. ना अपर्णाच्या घरच्यांनी कॉल केला, ना आमचा कॉल उचलला. रॉबिनचा फोन बंदच येत होता. त्यानंतर अपर्णाने फोनवर रॉबिन कुठे आहे माहिती नाही असं सांगितले. त्यानंतर घरच्यांनी रॉबिन बेपत्ता झाल्याची तक्रार दिली. २२ जूनला रॉबिनचा मोठा भाऊ बबलू रुइदास याच्या मोबाईलवर अज्ञात कॉल आला त्याने अपर्णाने रॉबिनची हत्या करून मृतदेह दफन केल्याचे सांगितले. बबलूने याबाबत पोलिसांना कळवले, त्यानंतर पोलिसांनी अपर्णाला ताब्यात घेतले. अपर्णाला खाकीचा धाक दाखवताच तिने तिचा गुन्हा कबूल केला.