फेसबुकवर चॅटिंगमध्ये व्यस्त असायची पत्नी; पतीला चारित्र्यावर संशय आला अन् मग...

पत्नी सतत फेसबुकवर व्यग्र असल्यानं पतीच्या मनात शंका आली

हुगळी: फेसबुकवरील चॅटिंगमुळे झालेला वाद एका महिलेच्या जीवावर बेतला आहे. पत्नी सातत्यानं चॅटिंग करत असल्यानं पतीला तिच्यावर संशय आला. त्यामुळे त्यांच्यात सातत्यानं वाद सुरू झाले. पतीनं पत्नीची गळा दाबून हत्या केली. पश्चिम बंगालच्या हुगळी जिल्ह्यात ही घटना घडली.

हुगळीतल्या चंदननगर परिसरात वास्तव्यास असलेल्या रिंटू दासनं त्याची पत्नी पल्लवी दासची (२३ वर्षे) गळा दाबून हत्या केली. पत्नी सातत्यानं फेसबुकवर चॅटिंगमध्ये व्यस्त असायची. पत्नी फेसबुकच्या माध्यमातून इतर पुरुषांशी मदत केल्याचा संशय पतीला होता. तो सातत्यानं पत्नीच्या चारित्र्यावर संशय घ्यायचा. याचवरून रविवारी दोघांमध्ये वाद झाला आणि पतीनं पत्नीची गळा दाबून हत्या केली.

घटनेची माहिती मिळताच पोलीस घटनास्थळी पोहोचले. त्यांनी मृतदेह ताब्यात घेऊन तो शवविच्छेदनासाठी पाठवला. रिंटू दास सतत वहिनीवर संशय घ्यायचा अशी माहिती त्याचा भाऊ सिंटू दासनं पोलिसांना दिली. 'वहिनीचा स्वभाव चांगला होता. मात्र भाऊ कायम तिच्यावर संशय घ्यायचा. तो अनेकदा तिला मारहाण करायचा. भावाच्या त्रासाला कंटाळून मी आई आई वेगळे राहू लागलो,' असं सिंटू दासनं सांगितलं.